У Беларусі на 10 сутак пасадзілі прарасійскага актывіста з Віцебска
Нагодай стаў "лайк" у Facebook / @vitebsk_info
Прарасійскага актывіста з Віцебска Сяргея Лашкова прысудзілі да 10 сутак за "экстрэмізм". Паводле слоў ягонай паплечніцы Эльвіры Мірсалімавай, нагодай стаў "лайк" у Facebook, які ён паставіў у 2020 годзе пад допісам "непалітычнага характару".
Паводле інфармацыі канала "Віцебск, я гуляю!", Сяргей Лашкоў — вядомы ў Віцебску майстар па абсталяванні мансард, які таксама актыўна прасоўвае ідэі "рускага свету" сярод мясцовых жыхароў.
Нагадаем, што ў Беларусі 13 сутак адміністрацыйнага арышту за "распаўсюджванне экстрэмізму" адбывае таксама прарасійская актывістка і даносчыца Вольга Бондарава.
