Малдова 20 кастрычніка правядзе рэферэндум аб уступленні ў ЕС
Больш за палову грамадзян Малдовы падтрымліваюць уступленне краіны ў ЕС / gettyimages.at
Малдова 20 кастрычніка 2024 года правядзе рэферэндум аб уступленні ў Еўрасаюз. У чацвер гэтую дату зацвердзіў парламент, паведамляе newsmaker.md.
Аўтары законапраекта змянілі пытанне, якое выносіцца на рэферэндум. Замест пытання "Вы за далучэнне Малдовы да ЕС?" у бюлетэні будзе пытанне: "Ці падтрымліваеце вы ўвядзенне еўрапейскай інтэграцыі ў Канстытуцыю Малдовы?". І два варыянты адказу: "Так" і "Не".
У выпадку, калі на рэферэндуме большасць выбаршчыкаў прагаласуюць "за", у прэамбуле Канстытуцыі з'явіцца згадка пра еўрапейскую ідэнтычнасць і незваротнасць еўрапейскага шляху развіцця Малдовы. Таксама там будзе асобны артыкул "Еўрапейская інтэграцыя". У ім адзначаць, што Малдова далучаецца да дамоваў аб стварэнні Еўрасаюза і да актаў, якія пераглядаюць устаноўчыя дамовы ЕС. Пасля далучэння да гэтых дамоваў і актаў у іх будзе прыярытэт перад нацыянальнымі законамі краіны.
Гэтыя папраўкі ўнясуць адразу пасля прызнання Канстытуцыйным судом вынікаў рэферэндуму. Дадатковага галасавання ў парламенце не прадугледжана.
Паводле красавіцкага апытання, 56% грамадзян Малдовы падтрымліваюць уступленне краіны ў ЕС.
