Naviband: Хацелі праспяваць "1944" па-беларуску за кулісамі

На мінулых выхадных прадстаўнікі Беларусі на "Еўрабачанні-2017" Naviband зладзілі прома-вандроўку ў Кіеў. Ксенія Жук і Арцём Лук'яненка далі інтэрв'ю шэрагу украінскіх СМІ, пабывалі ў эфіры радыёстанцый Europa Plus, ПерецFM i HappyRadio і ў якасці гасцей ўзялі ўдзел у першым паўфінале Нацыянальнага адбору Украіны.

Відэа, дзе наш дуэт спявае ў перакладзе на беларускую мову песню "1944" Джамалы, за два дні паглядзела 80 тысяч чалавек. Ідэя пераспяваць песню Джамалы (спявачка ўваходзіла ў журы нацыянальнага адбору і прысутнічала ў зале) належыць піяр-менеджару Сяргею Андрыянаву, які супрацоўнічае з Naviband падчас падтрыхтоўкі да "Еўрабачання". 

"Спачатку мы думалі гэта зрабіць за сцэнай, але рэжысёру трансляцыі ўкраінскага адбору спадабалася ідэя, таму вырашылі выканаць песню ў эфіры, — распавядае Сяргей Андрыянаў. — Пасля заканчэння трансляцыі Джамала і Naviband яшчэ паразмаўлялі. Спявачка сказала, што Naviband добра "запалілі" і выглядаюць вельмі самабытна. А таксама павязала на галаву падарунак ад Naviband — стужку з беларускім арнаментам". 

З сабой Naviband прывезлі ў Кіеў 10 метраў стужкі з арнаментам, які сімвалізуе рух і жыццё — тое, пра што спяваюць беларусы ў сваёй конкурснай песні "Гісторыя майго жыцця".

Апроч Джамалы, свой каментар наконт нумару Naviband даў і Андрэй Данілка, які парадаваўся, што ад Беларусі нарэшце едуць не "замежныя артысты" (маўляў, дагэтуль усе былі падобныя да замежнікаў, бо спявалі па-англійску), а прагучыць беларуская гісторыя на "Еўрабачанні".

 
Самі Naviband сёння на тэлефанаванні не адказваюць — "адыходзяць" ад паездкі. Сяргей Андрыянаў кажа, што неўзабаве гурт пачне працу па дапрацоўцы аранжыроўкі песні.

Пасля выступу ў Кіеве Naviband падняліся ў рэйтынгах букмекераў.