Навукоўцы адкрылі новы від рыбы, якая існавала ў Беларусі 400 млн гадоў таму
Гэта была прэснаводная рыба сярэдняй даўжынёй каля 9 сантыметраў / riviste.unimi.it
Група навукоўцаў, сярод якіх кандыдат геолага-мінералагічных навук і выкладчык БНТУ Дзмітрый Плакс, заявіла аб адкрыцці новага віду прэснаводных рыб, якія існавалі ў дэвонскі перыяд на тэрыторыі сучаснай Беларусі, піша канал “De facto. Беларуская навука”.
Навукоўцы правялі аналіз лускі, знойдзенай на тэрыторыі Беларусі, што стала падставай заявіць аб адкрыцці новага віду Moythomasia lebedevi. Даследаванне апублікавана ў часопісе The Rivista Italiana di Paleontologia e Stratigrafia. Moythomasia апісваецца як прэснаводная рыба, сярэдняя даўжыня якой каля 9 сантыметраў.
Дэвон — геалагічны перыяд палеазойскай эры, які пачаўся каля 416 млн, а скончыўся 360 млн гадоў таму. У гэты перыяд большая частка сучаснай Беларусі ўжо знаходзілася на сушы. Дэвонскі перыяд характарызаваўся вялікай разнастайнасцю рыб, таму яго таксама называюць “эпохай рыб”.
На сёння вядомыя толькі некалькі разнавіднасцяў вымерлага роду Moythomasia, падкрэслівае “De facto. Беларуская навука”. Папярэднюю навукоўцы адкрылі ў 2015 годзе.
