Парыс і Алена Траянская перажылі вывяржэнне вулкана — #ІхНоравы

11/04/2024 - 15:40

#ІхНоравы / @rubanau_collage

Вы гадаеце, пра што Лукашэнка гаварыў з Пуціным і ці пачнецца новая вайна? Адцягнем вас ад гэтых думак навінамі пра тое, што проста цяпер адбываецца ў Еўропе і ў свеце наогул.

Восем гадзін славы

Сам сябе не пахваліш — ніхто не пахваліць, вырашыў супрацоўнік мюнхенскай мастацкай галерэі і павесіў сваю працу ў экспазіцыю. Супрацоўнік тэхнічнага аддзела галерэі размясціў сваю карціну ў адной секцыі з Эндзі Уорхалам — на пустой белай сцяне ў калідоры.

Іншыя супрацоўнікі музея хутка гэта заўважылі, але маўчалі да закрыцця. А потым... звольнілі мужчыну, выпусціўшы вельмі напышлівую заяву для журналістаў:

"Супрацоўнік лічыць сябе мастаком і, хутчэй за ўсё, разглядаў сваю ролю ў мантажнай камандзе музея як паўсядзённую працу, скіраваную на падтрымку свайго сапраўднага паклікання", — расказаў Guardian прадстаўнік галерэі.

Асабіста нам вынаходлівасць мастака падабаецца больш, чым пурытанства галерэі. І, здаецца, Уорхалу б таксама спадабалася!

Еўропа закрывае дзверы

Пасля міграцыйнага крызісу, які разгарнуўся ў Еўропе ў 2015 годзе, ЕС шукаў спосабы ўзмацніць кантроль за сваімі межамі. Тады ў Стары Свет прыехала каля 1,3 мільёна чалавек — у асноўным гэта былі сірыйскія ўцекачы.

І нарэшце ў міграцыйнае заканадаўства ЕС унеслі змены.

Цяпер на межах блока ўзвядуць памежныя цэнтры, дзе людзей будуць трымаць на час разгляду іх запытаў наконт прытулку. А працэс дэпартацыі паскораць. Пакт, які прынялі еўрадэпутаты, таксама запатрабуе ад еўрапейскіх краін салідарнасці. Гэта значыць, што дзяржавы — сябры ЕС мусяць будуць альбо прыняць тысячы просьбітаў прытулку з Італіі і Грэцыі (у гэтыя краіны прыбыло больш за ўсё бежанцаў) — альбо дапамагчы ім матэрыяльна.

А яшчэ просьбітаў змогуць адпраўляць у бяспечныя краіны за межамі блока, калі там у чалавека ёсць сваякі або іншыя сувязі.

"Мы стварылі надзейную заканадаўчую базу для вырашэння праблем міграцыі і прадстаўлення прытулку ў ЕС. Баланс паміж салідарнасцю і адказнасцю. Гэта еўрапейскі шлях", — напісала ў Х прэзідэнтка Еўрапейскага парламента Раберта Метсола.

Прыхільнікі пераменаў лічаць, што цяпер працэдура прадстаўлення прытулку на мяжы ЕС паскорыцца, а новыя жорсткія сістэмы праверак прымусяць людзей, у якіх няма права на атрыманне міжнароднай абароны, вярнуцца ў свае краіны.

Але пакт не падабаецца ні крайне правым, якія лічаць яго занадта лайтовым, ні крайне левым. Няўрадавыя арганізацыі назвалі змены "крокам назад" у галіне правоў чалавека.

Калі еўрадэпутаты збіраліся галасаваць, іх перапынілі пратэстоўцы ў белых футболках. Актывісты скандавалі: "Гэты пакт забівае! Галасуйце супраць!" І кідалі папяровыя самалёцікі з каардынатамі караблекрушэнняў, якія цярпелі ўцекачы, што спрабавалі трапіць у ЕС па моры.

Хто выжыў у вулкане

Падчас раскопак у Пампеях знайшлі невядомыя раней фрэскі. І археолагі кажуць, што яны неверагодныя.

Фрэскі выявілі ў банкетнай зале. Асноўны колер сцен залы — чорны, відаць, такім чынам гаспадары хацелі замаскаваць сляды дыму ад лямпаў, якія запальваліся тут, калі садзілася сонца. Белая падлога інкруставаная мазаікай і складаецца з мільёна дробных дэталяў.

А на сценах — тыя самыя фрэскі. На адной з іх старажытнагрэцкі бог Апалон спрабуе спакусіць жрыцу Касандру. Тую, чые прароцтвы ў будучыні праігнаруюць у Троі — і горад будзе разбураны. На другой фрэсцы выяўленая сустрэча Парыса з Аленай.

Тая самая фрэска

#NationalPetDay A newly discovered fresco from Region 9 Pompeii. Paris kidnaps Helen thus starting the Trojan War, his dog by his side who looks a bit unsure about the whole thing... what a good boi!
Pompeii: The New Dig on TV Monday 15 April BBC Two in partnership with the #OU pic.twitter.com/KHISVjKMDc
— Elizabeth Saint C (@esaintc) April 11, 2024

Пампеі былі пахаваныя ў лаве і попеле вулкана Везувій у 79 годзе нашай эры. Катастрофу, у якой не змаглі выжыць людзі, перажыла культура Рымскай імперыі. Фактычна горад стаў галоўным у свеце акенцам, праз якое можна зазірнуць у тую эпоху.