Прэм'ер-міністр Пакістана Шахбаз Шарыф наведае Беларусь пасля Ураза-байрама

Кіраўнік урада Пакістана Шахбаз Шарыф плануе візіт у Беларусь, які адбудзецца 10–11 красавіка, адразу пасля святкавання Ураза-байрама. Як паведамляе aaj.tv, падрыхтоўка да гэтай паездкі пачнецца ўжо 3 красавіка — у гэты дзень у Мінск прыбудзе высокапастаўленая дэлегацыя на чале з федэральным міністрам Алімам Ханам.

Падчас візіту Шахбаз Шарыф сустрэнецца з Аляксандрам Лукашэнкам. Асноўнымі тэмамі перамоў стануць развіццё інвестыцыйнага супрацоўніцтва, пашырэнне гандлёвых сувязяў і эканамічнага ўзаемадзеяння паміж дзвюма краінамі. Таксама ў рамках абмеркавання бакі закрануць перспектывы сумеснай вытворчасці трактароў у Пакістане.

Акрамя таго, чакаецца, што пакістанскі прэм’ер выступіць з прамовай, у якой уздыме пытанні, звязаныя з канфліктам паміж Расіяй і Украінай, падкрэсліўшы важнасць мірнага ўрэгулявання і забеспячэння стабільнасці ў рэгіёне.