Прэс-сакратар МЗС Беларусі пракаментаваў сітуацыю з Кастусём Каліноўскім

29/03/2019 - 14:08

Прэс-сакратар МЗС Беларусі Анатоль Глаз пракаментаваў "Нашай ніве" сітуацыю з Кастусём Каліноўскім. Як вядома, у Вільні на гары Гедзіміна ў пачатку 2017-га былі знойдзены парэшткі 21 паўстанца 1863-1864 гадоў, пакараных смерцю расійскімі ўладамі. Асобы амаль усіх з іх былі ідэнтыфікаваныя, а сярод іх — Кастусь Каліноўскі.

Перапахаванне паўстанцаў у Вільні запланаванае на восень. Узнікла пагроза, што надпісы на іх магілах будуць толькі на літоўскай і польскай мовай. І гэта пры тым, што большасць з іх паходзяць з Беларусі. Літоўскія прадстаўнікі наракалі на адсутнасць цікавасці да перапахавання з боку ўладаў Беларусі. Да таго ж у Беларусі робяцца спробы перагледзець ролю і значэнне Кастуся Каліноўскага ў беларускай гісторыі. У такой сітуацыі ўзнік Беларускі грамадскі камітэта памяці паўстанцаў 1863-1864 гадоў. Да прэзідэнта Літвы звярнуліся 500 беларускіх дзеячаў грамадства і культуры.

"Для Беларусі Кастусь Каліноўскі — значны гістарычны дзеяч, — кажа Анатоль Глаз. — У гэтым не можа быць сумневаў. Не трэба дзяліць, каму ён больш належыць. Гэта сумесная спадчына, якая аб’ядноўвае народы Беларусі, Польшчы і Літвы".

Прэс-сакратар МЗС мяркуе, што памылковае ўражанне пра бяздзеянне беларускага знешнепалітычнага ведамства ў справе Каліноўскага склалася з-за таго, што яно канцэнтравала намаганні "на канкрэтных справах", пра зробленыя крокі СМІ практычна не інфармаваліся. "Але гэта не азначае, што нічога не робіцца", — кажа Глаз.

Прэс-сакратар МЗС нагадаў пра паездку ў канцы мінулага года ў Вільню беларускіх экспертаў, якія знаёміліся з даследаваннем парэшткаў паўстанцаў. "Зараз мы абмяркоўваем з літоўскім бокам магчымасці сумеснай працы для больш дакладнай ідэнтыфікацыі астанкаў, — кажа Анатоль Глаз. — У прыватнасці, гаворка ідзе пра магчымасць даследавання астанкаў старэйшага брата Кастуся Каліноўскага, пахаванага ў Беларусі".

Магчыма, гэта азначае, што не выключана эксгумацыя магілы Віктара Каліноўскага. Па словах Глаза, 29 сакавіка ў МЗС адбылася сустрэча з амбасадарам Літвы. Гаворка ішла не толькі пра гэта, але і пра надпісы на беларускай мове на магілах пры перапахаванні.

"Мы вельмі зацікаўлены ў дасягненні гістарычнай справядлівасці адносна гэтай асобы і гатовы актыўна ўзаемадзейнічаць і з нашымі літоўскімі, і польскімі партнёрамі, і з беларускай супольнасцю", — сказаў прэс-сакратар МЗС Беларусі.