У Бабруйску мужчына забіў кацяня на вачах у 10-месячнай дзяўчынкі

У Бабруйску мужчына забіў кацяня на вачах у 10-месячнай дзяўчынкі. Па факце "жорсткага абыходжання з жывёламі" распачатая крымінальная справа, паведамляе Следчы камітэт.

Жахлівае здарэнне адбылося ў канцы студзеня. У маладой сям'і ў гасцях быў сваяк з Клічаўскага раёна, 52-гадовы мужчына. Раніцай ён зайшоў у пакой, дзе знаходзілася гаспадырня з маленькай дачкой. Дзяўчынка гуляла з кацянём. Мужчына раптам схапіў жывёлу і кінуў яе аб сцяну, а пасля — яшчэ некалькі разоў на падлогу. Кацянё памерла. Напалоханае дзіця стала плакаць. Бацька дзяўчынкі, які забег у пакой, прагнаў сваяка з кватэры.

Зламыснік вярнуўся дадому і звярнуўся ў міліцыю, заявіў, што яго збіў пляменнік. Аднак падчас расследавання абставін справы высветлілася, што адбылося насамрэч. Дарэчы, цялесныя пашкоджанні ў сваяка сям'і аказаліся нязначнымі. Мужчыну чакае судова-псіхіятрычная экспертыза.

У 2023-м у Ваўкавыскім раёне вынеслі прысуд мясцоваму жыхару, які на вачах у дзяцей задушыў сабаку — два месяцы арышту.