У Беларусі заўважылі пару рэдкіх птушак — уцекачоў, што гняздзяцца ў Еўропе

18 сакавіка пад Гродна заўважылі пару нільскіх гусей, паведамляе “Дзікая прырода побач”. У Беларусі гэты від з’яўляецца выпадковай пералётнай птушкай. Ён уключаны ў катэгорыю “C” нацыянальнага спісу птушак як уцёклы від, які гняздуецца ў Еўропе.

Нільскі гусь паходзіць з Афрыкі. Гэтыя птушкі на працягу сотняў гадоў утрымліваюцца ў прыватных калекцыях Заходняй Еўропы.

Час ад часу яны збягаюць: такія асобіны сталі крыніцай сучасных папуляцый у Вялікабрытаніі, Нідэрландах, Бельгіі, Германіі, Даніі і Польшчы.

Від агрэсіўны да іншых птушак. Ён выціскае іншыя віды з месцаў кармлення, што асабліва небяспечна летам, калі многія вадаплаўныя птушкі не могуць лятаць падчас лінькі і вымушаныя карміцца на адным месцы.

Нільскі гусь — патэнцыйна небяспечны від для прыроды Беларусі. У ЕС ён уключаны ў Спіс найбольш небяспечных інвазіўных чужародных відаў.