У Беларусі ўпершыню з прымяненнем авіяцыі збілі беспілотнік
![Паводле рэсурсу "Беларускі гаюн", знішчальнік ВПС РБ мінулай ноччу ганяўся за парушальнікам](/sites/default/files/styles/gallery_main/public/2024-08/air.jpg.webp?itok=nLhyh3Fe)
Паводле рэсурсу "Беларускі гаюн", знішчальнік ВПС РБ мінулай ноччу ганяўся за парушальнікам / @Hajun_BY
Мінулай ноччу падчас чарговай расійскай атакі па Украіне адзін з дронаў зноў заляцеў на тэрыторыю Беларусі. Яго збілі з прымяненнем авіяцыі. Гэта адбылося ўпершыню, адзначае рэсурс "Беларускі Гаюн".
Інцыдэнт адбыўся ў Ельскім раёне Гомельскай вобласці. Паводле звестак рэсурсу, БПЛА кшталту Shahed зайшоў у паветраную прастору Беларусі ў раёне 3:30. Знішчальнік ВПС РБ каля 20 хвілін ганяўся за парушальнікам. Затым у раёне 3:55 у Ельскім раёне чулі не менш за 2 выбухі і назіралі яркую ўспышку ў небе.
На гэтым тыдні, нагадаем, расійскія дроны ўжо заляталі ў Беларусь. У аўторак, 27 жніўня, "Беларускі Гаюн" паведамляў, што мінімум на тэрыторыю РБ заляталі 6 шахедаў. Авіяцыя ВПС РБ была ў паветры ўсю ноч.
Адзначым таксама, што гэтай ноччу расіяне атакавалі сваімі ўдарнымі дронамі Кіеў. Паветраная трывога ў горадзе гучала двойчы. Падчас першай хвалі атакі ўкраінскую сталіцу атакавала больш за 10 расійскіх дронаў, адзначае Hromadske. Усе з іх збіла супрацьпаветраная абарона, але абломкі ўпалі на тэрыторыю жылой забудовы. Другая атака пачалася раніцай і доўжылася каля гадзіны.
![В Беларуси впервые с применением авиации сбили беспилотник](/sites/default/files/styles/default_image_paragraph/public/paragraphs/image/shahed.jpg.webp?itok=Fi0GBi2w)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.