Як беларускі алігарх спрабаваў абысці санкцыі пры дапамозе каталіцкай царквы

22/11/2023 - 16:57

Суд адмовіў Зайцаву ў скасаванні санкцый

Суд адмовіў Зайцаву ў скасаванні санкцый / motolko.help

Аляксандр Зайцаў — адзін з самых вядомых беларускіх прадпрымальнікаў, уладальнік кампаніі "Брэміна груп". Па некаторых ацэнках, ён уваходзіць у дзясятку самых паспяховых бізнесменаў у краіне. У розныя гады займаў дзяржаўныя пасады. Быў памочнікам прэм'ер-міністра Сяргея Сідорскага, а таксама Віктара Лукашэнкі. Таксама вядомы тым, што з'яўляўся спонсарам футбольнага клуба "Дынама-Брэст". Праз падтрымку рэжыму Лукашэнкі і расійскай агрэсіі супраць Украіны, кампаніі Зайцава знаходзяцца пад санкцыямі ЕС і ЗША, акрамя таго, ён знаходзіцца пад персанальнымі санкцыямі многіх краін.

8 лістапада стала вядома, што Еўрапейскі суд адмовіў у іску Аляксандру Зайцаву, які спрабаваў скасаваць уведзеныя супраць яго санкцыі ЕС.

Журналісты "Рабочага руху" даведаліся, якім чынам Аляксандр Зайцаў спрабаваў выйсці з-пад санкцый і пры чым тут каталіцкая царква.

Еўрарадыё пераказвае змест расследавання.

Як стала вядома РР, Зайцаў спрабаваў абысці еўрапейскія санкцыі вельмі нестандартным спосабам. Большасць еўрапейскіх суддзяў прытрымліваюцца каталіцкай веры. І менавіта праз царкву хацеў зняць накладзеныя на яго санкцыі.

Да іску аб скасаванні санкцый у якасці дадатку былі прымацаваныя дакументы, якія пацвярджаюць сувязь Зайцава з каталіцкай царквой.

Напрыклад, сярод іх аказалася апостальскае блаславенне Папы Рымскага Бенедыкта XVI ад 2011 года, пасведчанне аб прысваенні рыцарскага крыжа ордэна "За заслугі перад Венгрыяй", атрыманага ад былога прэзідэнта Венгрыі Янаша Адэра. Акрамя гэтага, ён падаў пасведчанне аб уручэнні рыцарскага ордэна Святога Георгія, якім яго ўзнагародзілі летась у Мінску не без дапамогі дзейнага каталіцкага святара.

Ксёндз-бізнесмен

Як высветлілі журналісты РР, у верасні 2021 года нейкі Ігар Лашук, з'яўляючыся дзейным ксяндзом, заснаваў кампанію ТАА "АЛІС МА".

З прычыны уведзеных на кампанію Зайцава "Брэміна груп" санкцый частка маёмасці была перапісаная менавіта на кампанію святара. У прыватнасці, як сцвярджаюць журналісты, такім чынам з-пад санкцый спрабавалі вывесці аэрадром "Орша" ў пасёлку Балбасава, арандатарам якога і з'яўлялася падсанкцыйная "Брэміна груп". Мяркуючы па дакументах, якія трапілі ў рукі расследавальнікаў, праектам распараджэння Лукашэнкі планавалася замена арандатара на нядаўна створанае ТАА "АЛІС МА".

Пазней на просьбу мітрапаліта Мінска-Магілёўскага Тадэвуша Кандрусевіча, Зайцаў пагадзіўся дабудаваць касцёл Святога Казіміра ў Стоўбцах, у гэты праект бізнесовец уклаўся больш, чым на 250 тысяч долараў.

Усяго, выявіў РР, Зайцаў выдаткаваў на беларускую каталіцкую царкву сама меней 585 тысяч долараў.

Ксёндз-бацька

Журналісты РР паведамляюць, што дзеянні Лашука могуць быць звязаныя са шчырымі намерамі атрымаць грашовую дапамогу на будаўніцтва храмаў для вернікаў. Але гэта яшчэ не ўсё.

Апрача іншага, увагу журналістаў прыцягнула нейкая Таццяна Савіцкая, якая некалькі разоў сумесна з ксяндзом выязджала з Беларусі. РР высветліў, што жанчына — маці-адзіночка, якая выхоўвае двух непаўналетніх хлопчыкаў, яны абодва — з імем па бацьку "Ігаравіч" і абодва з прозвішчам "Лашук". У перыяд з 2015 па 2020 год, Лашук, Савіцкая і двое дзяцей 10 разоў сумесна перасякалі мяжу Беларусі.

А ў 2017 годзе, Лашук асабіста прасіў амбасадара Славакіі Ёзэфа Мігаша выдаць Савіцкай візу і вызваліць яе ад консульскага збору. Нумар яе пашпарта супаў з пашпартам жанчыны, якую выявілі журналісты. У прашэнні Лашук падкрэсліў, што Таццяна Савіцкая з'яўляецца маці-адзіночкай.

Аднак, па сцвярджэнні РР, у базе АІС "Пашпарт" маюцца звесткі, што ў графе "бацька" ў дзяцей указаны ніхто іншы, як Ігар Лашук, што моцна супярэчыць кодэксу кананічнага права, паводле якога каталіцкаму святару забароненая нават спроба ўступаць у шлюб.