11 беларусаў увайшлі ў 12-ы пакет санкцый Еўрасаюза
Еўрасаюз / pixabay.com
У праект 12-га пакета санкцый Еўрасаюза за агрэсію Расіі супраць Украіны трапілі 11 беларусаў.
Як даведалася Радыё "Свабода", сярод іх намеснікі старшыні Дзяржаўнага вайскова-прамысловага камітэту Алег Мішчанка і Вячаслаў Рассалай, намеснікі дзяржаўнага сакратара Савета бяспекі Павел Муравейка і Аляксандр Рахманаў.
Таксама ў спісе старшыня КДК Васіль Герасімаў, чыноўнікі з Мінабароны Валерый Равенка і Сяргей Лагадзюк, начальнікі палігонаў, дзе рыхтавалі мабілізаваных расіян, камандзір 61-й авіябазы ў Баранавічах, якую выкарыстоўвалі для запуску ракет па Украіне, начальнік гомельскага філіяла "Белаэранавігацыі", адказны за прадастаўленне гомельскага аэрапорта для расійскіх самалётаў.
Гаворка ідзе пра візавыя санкцыі і замарозку замежных актываў.
Чакаецца, што галоўным у 12-м пакеце санкцый ЕС будзе забарона гандлю расійскімі дыямэнтамі і звадкаваным газам, а таксама імавернае узмацненне ліміту цэнаў на продаж расійскай нафты.
Абмеркаванне гэтага пакета санкцый адбудзецца ў Бруселі на гэтым тыдні.
