Ва ўкраінскі палон трапіў яшчэ адзін беларус, які ваяваў на баку Расіі

Ва ўкраінскі палон трапіў яшчэ адзін беларус, які ваяваў на баку Расіі (папярэдні выпадак быў у верасні). Відэа з ім апублікавала 77-я асобная аэрамабільная Наддняпранская брыгада Дэсантна-штурмавых войскаў Узброеных сіл Украіны. У адным з баёў яе байцы разам з сумежнымі падраздзяленнямі ўзялі ў палон 11 расійскіх вайскоўцаў. Падчас апытання палонных адзін з іх заявіў, што ён беларус.

На відэа мужчына кажа, што ён з Касцюковічаў Магілёўскай вобласці. Верагодна, быў на заробках у Расіі. Паводле слоў беларуса, сілавікі (паліцыянты) яго "прэсавалі", каб ён падпісаў "кантракт на вайну". Тры разы ён адмаўляўся.

"Потым я зноў напіўся і мяне прэсавалі, зноў узялі, — расказвае мужчына. — І я п'яны ўзяў і падпісаў. А потым, калі працверазеў, ужо позна было, я ўжо быў у Варонежы. Мяне туды завезлі п'янага".

"Наша ніва" мяркуе, што палонны — гэта 37-гадовы Артур Яфрэмаў. На відэа ён таксама заклікае не падпісваць кантракт з расійскім войскам. І дадае: "Нічога добрага там няма".

Дзе менавіта ваяваў беларус, не паведамляецца. Аднак згаданая ўкраінская брыгада яшчэ восенню вяла баі на Луганшчыне і Харкаўшчыне.

Значна больш беларусаў ваюе супраць расійскіх акупантаў у складзе Узброеных сіл Украіны. Многія з іх уваходзяць у склад Палка Каліноўскага альбо ў Беларускі добраахвотніцкі корпус.