Як беларусы таемна зарабляюць на вайне, маючы завод у ЕС. Расследаванне

Новае расследаванне каманды "Бюро" расказвае пра тое, як беларускія прадпрымальнікі нажываюцца, займаючыся продажам мікрасхем у Расію падчас вайны з Украінай.

"Асудзілі вайну"

 У 2016 годзе беларус Сяргей Хвалько разам з партнёрамі Максімам Богушам, Сяргеем Саяўцом і Дзмітрыйсам Радкевічсам (грамадзянінам Латвіі) запусцілі завод SMD Baltic па вытворчасці мікрасхем у Латвіі.

Пасля нападу Расіі на Украіну SMD Baltic публічна асудзіла ваенную агрэсію і заявіла, што перастала прымаць заказы з Расіі і Беларусі.

Але, як высветліла "Бюро", уладальнікі завода наладзілі таемныя пастаўкі мікрасхем у Расію.

У шэрых схемах задзейнічана цэлая сетка кампаній. Сярод кліентаў беларускіх і латвійскіх бізнэсмэнаў — буйны расійскі вытворца беспілотнікаў, у якім ёсць доля ў інавацыйнага фонду, які ўзначальвае дачка Уладзіміра Пуціна.

Проста змянілі назву 

У 2021 годзе SMD Baltic становіцца рэзідэнтам створанага беларускімі ўладамі індустрыяльнага парку "Вялікі камень".

А праз тры месяцы пасля нападу Расіі на Украіну беларуская кампанія "СМД Бай" раптам памяняла назву на "Мікрамаўнт" і ўжо восенню пачала пастаўкі электронікі ў Расію.