З Расіі ў Беларусь адправілі новы корпус рэактара для Беларускай АЭС

У панядзелак, 31 кастрычніка, з Расіі ў Беларусь адправілі новы корпус рэактара для Беларускай АЭС. Яго вырабілі на Валгадонскім прадпрыемстве "Атаммаш". Корпус будзе дастаўлены ў Астравецкі раён да канца года, інфармуе БЕЛТА.

Рашэнне пра замену было прынятае беларускім бокам ў жніўні пасля інцыдэнта на будаўнічай пляцоўцы з папярэднім корпусам. Як інфармавала Еўрарадыё, у ноч з 9 на 10 ліпеня корпус рэактара АЭС пераносілі з аднаго месца на другое на вышыні чатырох метраў, калі паламаўся пад'ёмны кран. Сам корпус замацавалі з перакосам. Паўгадзіны ён вісеў, нахіляючыся ўсё больш, пакуль не "датыкнуўся да зямлі".

Рашэнне пра замену было прынятае па выніках працы беларускай камісіі, якая працавала на будаўнічай пляцоўцы Астравецкай АЭС.