За "экстрэмізм" будуць судзіць дырэктара віцебскага ГЦ, дзе быў пажар
Віктара Вялюгу будуць судзіць за "экстрэмізм" / sb.by
У Віцебску будуць судзіць Віктара Вялюгу — дырэктара гандлёвага цэнтра "Беларусь", дзе ў снежні 2024-га адбыўся вялізны пажар.
Пасяджэнне па справе Вялюгі прызначанае на 19 лютага, піша паблік "Віцебск, я гуляю". Вінавацяць яго ў "распаўсюдзе экстрэмізму" (ч. 2 арт. 19.11 КаАП). Працэс будзе весці суддзя Кацярына Цыбульская.
Дарэчы, праз два тыдні пасля пажару паводле гэтага ж артыкула адбыўся суд над Вольгай Вялюга — верагодна, сваячкай бізнесоўца.
Пажар у віцебскім ГЦ "Беларусь" здарыўся 13 снежня 2024 года. З будынка эвакуявалі больш за 200 чалавек. У выніку пажару да медыкаў трапілі 20 пацярпелых. Пасля пажару адбыліся затрыманні, у адным з затрыманых СМІ апазналі Віктара Вялюгу.
Прычынай здарэння назвалі "непраектныя змены, якія ўнесеныя ў электраправодку", і кароткае замыканне. Будынак ГЦ вырашылі знесці. На яго месцы, хутчэй за ўсё, адновяць кінатэатр.
