Муж і жонка, якія зладзілі "экстрэмізм" у перапісцы між сабой, асуджаны 6-ты раз

Муж і жонка Сяргей Крупеніч​ і Анастасія Крупеніч-Кандрацьева асуджаны ў чацвер шосты раз, паведамляюць праваабаронцы. 

У гэты раз пратаколы на сям'ю Крупенічаў склалі за перасыл паведамленняў 18 чэрвеня адно аднаму, але з розных "экстрэмісцкіх" каналаў. На суддзе Анастасія распавяла, што не ведала аб тым, што гэты канал прызнаны "экстрэмісцкім" і што нельга такое дасылаць у прыватных паведамленнях мужу. Вынік — 13 сутак арышту. 

Сяргей паабяццаў суддзі ніколі больш не чытаць тг-каналы, аднак таксама быў пакараны 13-сутачным арыштам.

Мінулыя "суткі" ў Крупенічаў сканчаюцца ў суботу, 25 верасня. 

26-гадовых Анастасію і Сяргея першы раз затрымалі ў сярэдзіне ліпеня. З таго часу іх асудзілі агулам на 84 суткі кожнага за тое, што яны перасылалі ў прыватных паведамленнях адно аднаму інфармацыю з "экстрэмісцкіх" каналаў.

Пасля затрымання сям’і на адным з праўладных тг-каналаў з'явілася пакаяльнае відэа з Анастасіяй. Сцвярджалася, што яна як настаўніца адной з мінскіх гімназій даслала ў "экстрэмісцкі" канал асабістыя дадзеныя дзяцей супрацоўнікаў міліцыі.