На былую гомельскую журналістку Ларысу Шчыракову пачалі крымінальную справу
Ларыса Шчыракова / facebook.com/glomazd
На былую гомельскую журналістку Ларысу Шчыракову пачалі крымінальную справу паводле артыкула 369-1 Крымінальнага кодэксу (дыскрэдытацыя Рэспублікі Беларусь), паведамляе Радыё "Свабода".
Гамяльчанцы пагражае да чатырох гадоў пазбаўлення волі. Акалічнасці крымінальнай справы пакуль не вядомыя.
Як распавядала Еўрарадыё, Шчыракову затрымалі 6 снежня. Раней жанчына супрацоўнічала з шэрагам недзяржаўных СМІ, але з 2021 года занялася этнафотасэтамі: фатаграфавала людзей у народных строях.
16-гадовы Святаслаў, сын Шчыраковай, трапіў у прытулак. Родным Ларысы яго не аддалі, заявіўшы, што перадаць яго могуць толькі бацьку як законнаму прадстаўніку. Бацька Святаслава жыве ў расійскім Новасібірску і плануе прыехаць у Гомель.
