Прадстаўлены новыя доказы катаванняў і жорсткага абыходжання ў Беларусі

Міжнародны камітэт па расследаванні катаванняў у Беларусі прадставіў новыя доказы сістэмных катаванняў і жорсткага абыходжання з беларусамі. У даследаванні раскрываюцца асобы сілавікоў ГУБАЗіК, адказных за катаванні і рэпрэсіі супраць мірных грамадзян.

Пасля масавых пратэстаў у Беларусі 2020 года гэты аддзел МУС стаў адным з ключавых інструментаў палітычных рэпрэсій. Мэта даследавання — дэананімізаваць злачынцаў у пагонах, датычных да катаванняў і жорсткага абыходжання, перадаць іх даныя ў органы правасуддзя і дамагчыся справядлівасці.

Ключавыя фігуры

У расследаванні згадваюцца Аляксандр Алёкса, Валерый Высоцкі і Іван Тарасік. Яны кіравалі аперацыямі па затрыманнях, фабрыкацыі абвінавачанняў і ўжыванні катаванняў для атрымання прызнанняў. У новым даследаванні апісваюцца іх метады працы.

Міжнародныя наступствы

У верасні 2024 года Літва звярнулася ў Міжнародны крымінальны суд (МКС) з просьбай расследаваць злачынствы супраць чалавечнасці, учыненыя беларускімі сілавікамі. Літва настойвае, што частка злачынстваў была здзейснена і на яе тэрыторыі, што дае МКС юрысдыкцыю паводле прынцыпу тэрытарыяльнасці.

Даследаванне падкрэслівае, што злачынствы ГУБАЗіК носяць сістэмны характар. Праваабаронцы настойваюць на прыцягненні вінаватых да адказнасці паводле прынцыпу ўніверсальнай юрысдыкцыі, што дазволіць распачаць справы супраць датычных незалежна ад іх грамадзянства і месца здзяйснення злачынстваў.

Цалкам азнаёміцца з тэкстам даследавання можна па гэтай спасылцы.