Сіняўскі: беларускім ратавальнікам "не будуць выдаваць кулямёты і гранатамёты"
Міністр па надзвычайных сітуацыях Беларусі Вадзім Сіняўскі ў эфіры тэлеканала АНТ пракаментаваў новаўвядзенне — запланаванае атрыманне супрацоўнікамі МНС зброі. "Ніякай надзвычайшчыны тут няма, — кажа ён. — ...Чалавек у пагонах павінен умець валодаць табельнай зброяй".
Паводле слоў Сіняўскага, ратавальнікам "не будуць выдаваць кулямёты і гранатамёты", яны атрымаюць "пісталеты і аўтаматы". У МНС ужо "арганізаваны спецыяльныя пакоі для захоўвання зброі". Іх 11. У іншых падраздзяленнях зброя будзе захоўвацца ў міліцыі і выдавацца "у выпадку неабходнасці", "выкарыстоўвацца па прызначэнні".
Раней міністр казаў, што ратавальнікі атрымаюць зброю ўжо ў першай палове чэрвеня. З яго слоў вынікала, што іх могуць прыцягнуць для барацьбы з "масавымі беспарадкамі". Аляксандр Лукашэнка анансаваў узбраенне супрацоўнікаў МНС у лютым 2022-га. Па яго версіі, яны ўстануць побач з войскам "на абарону радзімы". Кіраўнік МНС гэта пацвердзіў: "Частка нашых людзей [у выпадку вайны] будзе перададзеная Мінабароны для ўкамплектавання адпаведных падраздзяленняў".
Вадзім Сіняўскі стаў міністрам па надзвычайных сітуацыях у сакавіку 2021 года. Раней ён кіраваў міліцыяй у Гродзенскай вобласці.
Да 2020 года МНС мела ў беларускім грамадстве пазітыўны імідж. Аднак падчас масавых пратэстаў супрацоўнікі ведамства былі кінутыя на барацьбу супраць нацыянальных бел-чырвона-белых сцягоў, што падарвала імідж ратавальнікаў.
