Стала вядома, чаму беларусы разводзяцца

Штогод беларускія суды атрымліваюць заявы аб разводзе ад больш чым 30 тысяч сем'яў. Для разумення: гэта больш за палову ад колькасці зарэгістраваных шлюбаў.

І галоўная прычына разладаў — далёка не здрада. Як у эфіры Першага канала беларускага радыё паведаміла суддзя Вярхоўнага суда Вера Кругава, у 54% выпадкаў прычына разводу — "несумяшчальнасць характараў", розныя погляды на будучыню або "адсутнасць агульных інтарэсаў". 

Каля 20% пар указваюць як прычыну разводу "паасобнае пражыванне на працягу доўгага часу", а "страту любові і павагі" — больш за 10%.

Шкодныя звычкі або хатні гвалт як прычыну заявы называюць у 10% выпадкаў. А вось здрады — толькі ў 7% ад заяў.

Пераважную большасць заяў на развод (72%) падаюць жанчыны.

Статыстыка па разводах у Беларусі

Калі ў 2020 годзе было больш за 35 тысяч разводаў, то ў 2023 — 33,9 тыс. Але і зарэгістраваных шлюбаў таксама стала заўважна менш. Калі ў 2015 годзе ў Беларусі было зарэгістравана больш за 82 тысячы шлюбаў, то ў 2023 — крыху больш за 56 тысяч. Менш за ўсё шлюбаў было зарэгістравана ў 2020 годзе — 50 тысяч.

Паводле статыстыкі, у 2023-м на кожную тысячу шлюбаў прыпадала 606 разводаў. Для параўнання: у 2014-м у Беларусі было 402 разводы на кожную 1000 шлюбаў.