У дзень, калі Лукашэнка праводзіць выбары, пройдзе з'езд беларускіх дэмсіл

У дзень, калі Аляксандр Лукашэнка праводзіць у Беларусі так званыя прэзідэнцкія выбары, 26 студзеня 2025-га, у Варшаве пройдзе з'езд беларускіх дэмакратычных сіл. Пра гэта паведаміла кіраўніца Аб'яднанага пераходнага кабінета Беларусі Святлана Ціханоўская.

“Каб прадэманстраваць наша адзінства і салідарнасць з палітычнымі зняволенымі, а таксама пазначыць прыярытэты на 2025 год, — цытуе яе тлумачэнне "Позірк". — Важна данесці да беларусаў, што наша барацьба працягваецца. Рэжым у Беларусі далёкі ад стабільнасці. І мы павінны быць гатовыя да любых нечаканасцяў. Як паказалі падзеі ў Сірыі, у дыктатурах перамены могуць наступаць нечакана".

Якія палітычныя сілы паўдзельнічаюць у мерапрыемстве, пакуль невядома.

Ціханоўская падкрэсліла, што Лукашэнка "не прэзідэнт і пасля студзеня не адновіць ніякай легітымнасці". Мяркуецца, што мэта рэжыму — правесці выбары, не дапускаючы ніякіх пратэстаў, і пасля заявіць пра легітымнасць Аляксандра Лукашэнкі. Для гэтага не спыняюцца рэпрэсіі. А Святлана Ціханоўская кажа, што ў Беларусі ўвогуле тэрор.

“Гэта будзе больш падобна на ваенную аперацыю, чым на выбары..., — гаворыць Ціханоўская. — Мы ўжо можам сказаць, што няма ўмоў для правядзення свабодных і справядлівых выбараў і міжнародная супольнасць не можа іх прызнаць".

Еўракамісар па пытаннях пашырэння Марта Кос на канферэнцыі Standing with the people of Belarus у Бруселі паведаміла, што ЕС выдзяляе 30 мільёнаў еўра для дапамогі беларусам.