У Крычаве чыноўнікам прыгразілі адміністрацыйнай адказнасцю

У Крычаве (Магілёўская вобласць) чыноўнікам прыгразілі адміністрацыйнай адказнасцю. Іх могуць пакараць за "няпоўны або некампетэнтны адказ заяўніку". Прагучала гэта на пасяджэнні Крычаўскага райвыканкама. Яго старшыня Андрэй Сядукоў быў незадаволены зніжэннем колькасці зваротаў мясцовых жыхароў у выканкам (дарэчы, большасць з іх — пісьмовыя).

Адначасова была адзначана "негатыўная тэндэнцыя" — людзі сталі больш пісаць у аблвыканкам, КДК і Адміністрацыю Лукашэнкі. А паколькі на нарадзе гаворка ішла пра "нядбалы, некампетэнтны" і доўгі разгляд, пра недастатковае абгрунтаванне адмоваў, відаць, жыхары горада і раёна сталі пісаць у Магілёў і Мінск, не дабіўшыся вырашэння праблемы на месцы.

На нарадзе райвыканкама было прынятае рашэнне правесці ў Крычаве "навучальны семінар па рабоце са зваротамі грамадзян".