У Петрыкаве судзілі гаспадара аўчаркі, якая ўкусіла за твар дзіця

У Петрыкаве на Гомельшчыне судзілі гаспадара нямецкай аўчаркі, якая ўкусіла за твар дзіця. Суд спагнаў з яго кампенсацыю маральнай і матэрыяльнай шкоды здароўю.

Здарэнне адбылося ў канцы зімы. Аўчарка ўкусіла за шчаку дзяўчынку 2013 года нараджэння. Яе лечаць дагэтуль: спачатку ў Петрыкаўскай раённай бальніцы, пасля — у Мазырскай гарадской бальніцы, далей быў платны медцэнтр. Экспертыза засведчыла, што дзіця атрымала цяжкія цялесныя пашкоджанні. Бацькі звярнуліся ў суд за грашовай кампенсацыяй. У выніку з мужчыны спагналі 21 тысячу рублёў кампенсацыі маральнай шкоды, 778 рублёў — матэрыяльнай шкоды. Гаспадара сабакі прыцягнулі і да адміністрацыйнай адказнасці — аштрафавалі на 600 рублёў.