У Віцебскай вобласці пачалі вырошчваць беларускі тытунь

Пад Віцебскам збіраюць ураджай першага беларускага тытуню, піша "Сельская газета". Тытунь вырасцілі на вопытных дзялянках Віцебскага занальнага Інстытута сельскай гаспадаркі НАН Беларусі. Яны размешчаны каля аграгарадка Тулава. 

Гэта быў эксперымент. У прамысловых маштабах у Беларусі тытунь пакуль не вырошчваюць. Эксперыментавалі з двума гатункамі: "беларускі цыгарэтны" і "беларускі цыгарны". Іх аўтар — намеснік дырэктара Віцебскага занальнага інстытута па навуковай рабоце Віктар Сатышур. Займацца вырошчваннем тытуню ён пачаў яшчэ на Палессі, калі быў супрацоўнікам Палескага аграрна-экалагічнага інстытута НАН Беларусі. У Віцебску працягнуў гэтую працу. 

"Насенне, якое добра ўзышло на віцебскай глебе, прадаставіла прыватнае гандлёва-вытворчае ўнітарнае прадпрыемства "БелТабакСемена", — распавядае Сатышур. Расліны вымахалі пад два метры. У кожнага куста да 22 лісця. Іх збіраюць па чарзе. 

"На сёння сабралі па 12 лісцяў з кожнай расліны. На чарзе астатнія", — адзначыў спецыяліст. Уборку беларускага тытуню плануюць завяршыць да сярэдзіны верасня. На думку Сатышура, "станоўчая ацэнка сабранага пад Тулава тытуню адкрые новыя перспектывы, у тым ліку па імпартазамяшчэнні". Ён мяркуе, што беларускім тытунём "рэальна закрыць як мінімум палову патрэбаў тытунёвай галіны краіны".