У Жыровічах знішчылі фрэску аўтарства Рамана Бандарэнкі
Фрэска ў Жыровічах / t.me/christianvision
У Свята-Успенскім манастыры ў Жыровічах знішчылі фрэску, у стварэнні якой прымаў удзел мастак Раман Бандарэнка, піша "Хрысціянская візія".
Фрэска размяшчалася на сцяне ў кавярні-трапезнай для паломнікаў манастыра. На ёй быў намаляваны манастыр пад апекай Жыровіцкага абраза Божай Маці. Фрэска была створаная ў рамках дыпломнай работы ў Мінскім дзяржаўным архітэктурна-будаўнічым каледжы. На сцяне каля яе была шыльда з імёнамі стваральнікаў фрэскі, там было згадваўся і Раман Бандарэнка.
Цяпер у кавярні-трапезнай пачаліся рамонтныя работы. Фрэску зафарбавалі, на яе месцы з'явілася выява абраза "Тайная вячэра". Шыльду з імем Рамана Бандарэнкі таксама знялі са сцяны.
Мастак Раман Бандарэнка загінуў 12 лістапада 2020 года ў Мінску. У датычнасці да яго гібелі падазраюць сілавікоў і высокапастаўленых праўладных актывістаў, але ўлады прыпынілі расследаванне справы.
Сёлета 12 лістапада прадстаўнікі беларускай дыяспары правялі акцыі памяці Рамана Бандарэнкі ў разнастайных краінах.
