Улады ліквідуюць аб'яднанне алерголагаў і імунолагаў
У Беларусі ліквідавалі аб'яднанне алерголагаў і імунолагаў / pixabay.com, ілюстрацыйнае фота
6 сакавіка Вярхоўны суд пастанавіў ліквідаваць Беларускую грамадскую арганізацыю "Асацыяцыя алерголагаў і клінічных імунолагаў". Як паведамляе "Віцебская вясна", ініцыятарам ліквідацыі выступіла Міністэрства юстыцыі.
Офіс арганізацыі быў у Віцебску. Яе асноўнымі заснавальнікамі і чальцамі з'яўляліся пераважна супрацоўнікі Віцебскага дзяржаўнага медуніверсітэта.
"Асацыяцыя алерголагаў і клінічных імунолагаў” была заснаваная ў 1998 годзе. З 2013 года яна ўваходзіла ў Сусветную арганізацыю алергіі (WAO).
Сябры арганізацыі распрацоўвалі і ўкаранялі ў практыку новыя метады дыягностыкі, лячэння і прафілактыкі алергічных захворванняў, імунадэфіцытаў і іншых відаў імунапаталогіі. Сярод іх былі сапраўдныя прафесіяналы: толькі ў кіраўніцтве асацыяцыі працавалі восем прафесараў і пяць дацэнтаў.
Асацыяцыя трапіла пад "зачыстку" грамадскіх арганізацый, якая ідзе ў Беларусі з ліпеня 2021 года. За гэты час былі знішчаныя сотні грамадскіх арганізацый.
