Вольгу Брыцікаву перавялі з Наваполацка ў СІЗА ў Віцебск

Вольгу Брыцікаву перавялі з Наваполацка ў СІЗА-2 ў Віцебск. Праваабаронцы мяркуюць, што супраць яе распачалі крымінальную справу. Але дакладных звестак пра гэта пакуль няма, піша @viasna96.

Брыцікава працавала начальнікам аддзела рэалізацыі нафтапрадуктаў на "Нафтане". У жніўні 2020-га яна стала актыўнай удзельніцай пратэстаў на прадпрыемстве. Калі ў той час праходзіў сход працоўных з удзелам кіраўніка Камітэта дзяржаўнага кантроля Івана Тэртэля (цяпер — старшыня КДБ), якраз Вольга Брыцікава агучыла патрабаванні да ўладаў. У канцы 2020-га яе звольнілі, а ў 2021 годзе яна стала кіраўніком незалежнага прафсаюза на "Нафтане".

Сёлета Вольга Брыцікава правяла за кратамі 75 сутак адміністрацыйнага арышту (яе судзілі пяць разоў запар, у тым ліку і за "антываенныя акцыі", давалі па 15 сутак). Яна была затрыманая ў канцы зімы, а выйшла на волю ў сярэдзіне траўня.

Пра чарговае затрыманне Брыцікавай стала вядома 1 лістапада, а 3-га яе асудзілі на 15 сутак арышту за "распаўсюд экстрэмісцкіх матэрыялаў". За кратамі яна аб'яўляла галадоўку. Пасля ёй дадалі яшчэ 15 сутак.