Вяртанне вампіркі, вавёрка з “інсты” ды таямнічая пасылка — #ІхНоравы

01/11/2024 - 13:14

Замежныя навіны / @rubanau_collage

У Швецыі рэканструявалі вампірку, якая памерла 400 гадоў таму, а ў ЗША разгараюцца спрэчкі наконт інстаграмнай вавёркі. Адны людзі лічаць, што ёй не месца ў доме, іншыя разумеюць, што застануцца без любімай інстазорачкі.

Ці прывядуць дыскусіі да чагосці канструктыўнага — гэта пытанне, як і тое, што знаходзіцца ў таемных пасылках, якія за 10 еўра прапануюць набыць жыхарам Германіі.

Падрабязней пра гэта, а таксама пра тое, чым здзівіў Таранціна аматараў сваёй творчасці, чытайце ў нашым традыцыйным аглядзе міжнародны падзей “Іх норавы”.

Рэканструяваная вампірка

Шведскі археолаг і скульптар Оскар Нільсан рэканструяваў твар маладой полькі, якая памерла ў XVII стагоддзі.

На момант смерці дзяўчыне было прыкладна 18-20 гадоў. Праз незвычайнае пахаванне яе назвалі вампіркай.

І гэта не дзіўна. На адным пальцы яе нагі быў замацаваны трохкутны замок, а на шыі вісеў серп. Са слоў экспертаў, гэтыя прадметы могуць сведчыць пра антывампірычны рытуал, але зусім не паказваюць на тое, што польку лічылі ўвасабленнем нячыстай сілы.

— Не выключана, што дзяўчына была проста хворая або ў яе быў нейкі фізічны ці псіхічны дэфект. Магчыма, блізкія дрэнна абыходзіліся з ёй, калі тая была жывою, і баяліся, што яна будзе палохаць іх пасля смерці, — тлумачыць прафесар універсітэта Дарыюш Паліньскі.

Шматлікія ананімныя скаргі на гаспадара Peanut прывялі ў сераду ў дом Марка Лонга не менш як шасцярых афіцэраў з Дзяржаўнага дэпартамента аховы навакольнага асяроддзя (DEC).

— Яны прыйшлі да мяне дадому і ўварваліся без ордара на ператрус, каб знайсці вавёрку! Са мной абыходзіліся так, нібы я быў наркадылерам, а ў мяне дома шукалі наркотыкі са зброяй, — абураецца Марк Лонг.

Афіцэры сышлі з вавёркай, якая за сем гадоў сабрала сотні тысяч падпісчыкаў у Instagram, TikTok ды іншых платформах. Яны забралі і янота Фрэда, які нядаўна таксама пасяліўся ў Лонга.

Да вечара чацвярга Лонг сабраў амаль 20 000 подпісаў пад патрабаваннем вярнуць Peanut і кажа, што наняў юрыдычную каманду, каб усё атрымалася.

У сваю чаргу, прадстаўнік DEC заявіў, што агенцтва пачало расследаванне пасля атрымання “некалькіх паведамленняў ад грамадскасці аб патэнцыйна небяспечным размяшчэнні дзікіх жывёл, якія могуць пераносіць шаленства, і незаконным утрыманні ў доме дзікіх жывёл”.

— Я не ведаю, ці жывы Peanut, і не ведаю, дзе ён, — кажа гаспадар.

Прэс-сакратар DEC не адказаў на пытанне пра тое, усыпілі вавёрку ці не.

Пасылкі з сюрпрызам

У Германіі з'явіліся аўтаматы, у якіх за 10 еўра можна набыць чужыя пасылкі. Унутры — тавары, якія не змаглі даставіць адрасатам, а таксама забытыя тавары ці тыя, што вярнулі. Якія менавіта — сюрпрыз. Адрасы і імёны на канвертах схаваныя.

На сёння акцыя дзейнічае ў Кёльне, Гамбургу ды некаторых іншых нямецкіх гарадах.
Аўтаматы часта знаходзяцца не ў самых людных месцах. Людзі даведваюцца пра іх з сацсетак, дзе многія хваляць гэтую канцэпцыю.

А як вам такая ідэя — заплаціць 10 еўра і атрымаць пасылку з сюрпрызам?