Затрыманы ў Маскве беларус Аляксей Кудзін просіць палітычнага прытулку ў Расіі

Неаднаразовы чэмпіён свету па кікбоксінгу 35-гадовы Аляксей Кудзін быў жорстка затрыманы міліцэйскім спецназам у жніўні 2020-га ў Маладзечне. Перад гэтым ён удзельнічаў у пратэстах у горадзе супраць фальсіфікацыі вынікаў прэзідэнцкіх выбараў. Людзей разагналі. Сілавікі спрабавалі затрымаць тады і Кудзіна, але няўдала. Спачатку быў адміністрацыйны арышт у жніўні. У кастрычніку спартсмена аштрафавалі па адміністрацыйнай справе (за "парушэнне парадку арганізацыі ці правядзення масавых мерапрыемстваў") на 675 рублёў. Пасля стала вядома, што Аляксея Кудзіна абвінавачваюць па артыкуле "Супраціўленне супрацоўніку органаў унутраных спраў" (арт. 363 КК), яму пагражае да 5 гадоў пазбаўлення волі.

У лістападзе спартсмен не прыйшоў у суд, яго аб'явілі ў вышук. Высветлілася, што яму ўдалося выехаць за мяжу. У Маладзечне ў яго засталася сям'я.