Кудзін расказаў, як пасля яго ўдараў сілавікі разляталіся ў розныя бакі

07/12/2020 - 14:57

Неаднаразовы чэмпіён свету па кікбоксінгу Аляксей Кудзін даў інтэрв'ю "Т.." і падрабязна расказаў пра свой удзел у пратэстах у жніўні ў Маладзечне, пра крымінальную справу і вымушаны ад'езд за мяжу. Паводле яго слоў, 9 жніўня ён прыйшоў на цэнтральную плошчу горада, "каб выказаць сваю грамадзянскую пазіцыю па выніках выбараў, якія былі сфальсіфікаваны".

У той дзень сілавікі не рашаліся на яго напасці — ці пазнавалі, ці проста баяліся. А вось 10 жніўня "зачыстку" плошчы праводзілі байцы ўнутраных войск з Бабруйска. Кудзін з іншымі людзьмі стаяў перад імі з паднятымі рукамі, а сілавікі напалі — пырскалі газам з балончыка і пачалі біць дубінкамі. Дасталося і спартсмену, і ён адказаў — у прапаршчыка вырваў шчыт і ўдарыў рукой па шлеме. Пасля на Аляксея Кудзіна пачалі нападаць іншыя байцы, білі дубінкамі, а ён ухіляўся і біў у адказ. Некаторыя сілавікі падалі (у крымінальнай справе згадваюцца некалькі сілавікоў, адпраўленых у накаўт).

Тады Кудзін з месца здарэння збег. Пасля яму казалі, што калі б байцы ўнутраных войскаў яго затрымалі ў той вечар, то "забілі б ці пакалечылі" — такія былі злыя на яго.

Затрымлівалі Аляксея Кудзіна байцы зводнага атрада хуткага рэагавання, з якімі ён раней разам трэніраваўся. Аказваецца, ім сказалі, што ён забіў нейкага міліцыянера, таму дзейнічалі вельмі жорстка. Спачатку пад машыну кінулі святлошумавую гранату. Шкло ў дзвярах было апушчанае, і сілавікі ўдарылі яго некалькі разоў кулаком і стрэлілі ва ўпор у грудзі тры разы з траўматычнага пісталета. Далей білі дубінкамі. Наступствы таго збіцця адчуваюцца дагэтуль.

Спартсмен рыхтаваўся, што ў міліцыі, у СІЗА яго будуць жорстка "прэсаваць". Аднак адносіліся там з павагай. Магчыма, дапамагло тое, што за яго заступаліся байцы з усяго свету. "Гэта была самаабарона, — кажа Кудзін. — Я ведаў, што нікога спецыяльна першым не біў... Ніякім баевіком ці злачынцам сябе не лічу".

8 кастрычніка ў Маладзечне спартсмена аштрафавалі па адміністрацыйнай справе (за "парушэнне парадку арганізацыі ці правядзення масавых мерапрыемстваў") на 675 рублёў. Але была распачата і крымінальная справа за супраціўленне супрацоўніку органаў унутраных спраў. Па ёй пагражала да 5 гадоў зняволення. 19 лістапада Кудзін не прыйшоў у суд у Маладзечне, яго аб'явілі ў вышук. Пазней ён паведаміў, што змог выехаць за мяжу (падрабязнасці ад'езду за мяжу спартсмен у інтэрв'ю не стаў раскрываць). На радзіме ў яго засталася сям'я.