Аб'яўлены ў вышук баец змешаных адзінаборстваў Аляксей Кудзін з'ехаў за мяжу

У Беларусі на Кудзіна завялі крымінальную справу за супраціўленне супрацоўніку органаў унутраных спраў падчас падаўлення жнівеньскіх пратэстаў. 19 лістапада ён не прыйшоў у суд у Маладзечне, пасля чаго быў аб'яўлены ў вышук.

Аляксей Кудзін быў затрыманы ў Маладзечне 10 жніўня, калі знаходзіўся ў раёне цэнтральнай плошчы, дзе сілавікі разганялі пратэстоўцаў. 35-гадовы спартсмен апынуўся ў ізалятары ў Жодзіне. Адразу была пагроза, што могуць распачаць крымінальную справу па артыкуле "Гвалт альбо пагроза ўжывання гвалту ў дачыненні да супрацоўніка органаў унутраных спраў". Нібыта ён супраціўляўся пры затрыманні. Аднак 8 кастрычніка ў Маладзечне спартсмен быў аштрафаваны па адміністрацыйнай справе (за "парушэнне парадку арганізацыі ці правядзення масавых мерапрыемстваў") на 675 рублёў.

Надзея, што пакаранне абмежавалася адміністрацыйнай справай, не спраўдзілася. Па крымінальнай справе Кудзіну пагражала да 5 гадоў пазбаўлення волі.