24 гадзіны абдымашак з дрэвам і кот-падарожнік — #ІхНоравы

04/09/2024 - 14:57

Міжнародныя навіны / @rubanau_collage

Кот Шота знік яшчэ ў студзені 2022 года, праз два гады яго знайшлі за 3000 км ад дома. Як пухнаты здзейсніў такі доўгі шлях, ніхто не ведае, але яго гаспадары шчаслівыя з ім уз'яднацца.

Пра гэта і не толькі чытайце ў нашай штодзённай падборцы міжнародных навін.

У ЗША згубленага ката знайшлі за 3000 км ад дома праз два гады

Ката з амерыканскага штата Тэхас знайшлі ў Масачусэтсе праз два гады пасля знікнення. Ніхто не ведае, як жывёліна апынулася так далёка ад дома.

Кот Шота знік з дому ў Тэхасе ў студзені 2022 года, падчас моцнага пахаладання. Праз два гады знясіленага гадаванца знайшоў жыхар Масачусэтса і вырашыў аднесці яго ў прытулак.

Супрацоўнікі арганізацыі знайшлі ў Шота чып, адсканавалі яго і звязаліся з гаспадыняй гадаванца Карлай. Калі яна ўбачыла званок з іншага штата, то спачатку вырашыла, што гэта спам, і нават не хацела адказваць.

На шчасце, Карла ўсё ж адказала на званок і ў хуткім часе паехала па Шота. Паездка ў адзін канец з Тэхаса да Масачусэтса заняла ў яе 26 гадзін.

Карла расказала, што Шота — яе першы і адзіны кот. Яна страшна сумавала па ім і не верыла, што зноў зможа яго ўбачыць.

"Ніхто, акрамя Шота, ніколі не даведаецца, як ён дабраўся да Масачусэтса, што перажыў і каго сустрэў на сваім шляху. Гэтая прыгода назаўжды застанецца яго таямніцай", — напісалі супрацоўнікі прытулку ў пасце, дадаўшы, што для іх стала вялікім гонарам вярнуць любімца ў сям'ю пасля "такога доўгага расстання".

Францыя хоча забараніць смартфоны ў школах

Прыкладна дзвесце навучальных устаноў Францыі з гэтага года ўвялі "лічбавую змену": пра эксперыментальную забарону вучням карыстацца мабільнымі тэлефонамі, прычым не толькі на ўроках, але і на перапынках, паведамляе Euronews.

Аўтары ідэі сцвярджаюць, што гэта дапаможа канцэнтрацыі ўвагі на занятках і знізіць шанцы кібербулінгу.

Францыя ідзе курсам многіх іншых еўрапейскіх краін, якія ўзлаваліся на тэлефоны ў класах. Калі эксперымент палічаць паспяховым, поўную забарону на мабільнікі ва ўсіх французскіх школах могуць увесці ўжо са студзеня.

У Турцыі экстрэмісты напалі на амерыканскіх салдат

У турэцкім горадзе Ізмір група нацыяналістаў днём напала на амерыканскіх салдат, піша BILD.

На відэазапісе, які распаўсюдзіўся ў сацыяльных сетках, відаць, як удзельнікі ультранацыяналістычнай арганізацыі Türkiye Gençlik Birliği ("Саюз турэцкай моладзі") трымаюць амерыканскага салдата ў цывільным і надзяваюць яму на галаву мяшок, выкрыкваючы лозунг Yankee go home ("Янкі — дадому").

"Амерыканскія салдаты, на руках якіх кроў нашых салдат і тысяч палестынцаў, не могуць апаганьваць нашу краіну. Кожны раз, калі вы будзеце ступаць на гэтую зямлю, мы будзем сустракаць вас так, як вы таго заслугоўваеце", — абвяшчае подпіс да відэа.

Турэцкія ўлады пацвердзілі, што на двух чальцоў экіпажа амерыканскага вайсковага карабля USS Wasp, які стаяў на якары ў гавані Ізміра, напалі 15 чалавек. Паліцэйскія, як паведамляецца, умяшаліся і затрымалі падазраваных у нападзе.

Хлопец з Ганы абдымаў дрэва 24 гадзіны. Ён увайшоў у Кнігу рэкордаў Гінеса

23-гадовы жыхар Ганы Абдул Хакім Авал паставіў сусветны рэкорд па самым доўгім абдыманні дрэва.

Малады чалавек прастаяў 24 гадзіны 21 хвіліну, абхапіўшы дрэва рукамі. Згодна з правіламі, перарывацца яму не дазвалялася — інакш рэкорду не залічылі б.

Паводле Авала, яго спроба паставіць сусветны рэкорд закліканая падкрэсліць важнасць захавання прыроды ў Гане. Малады чалавек паабяцаў высадзіць у сваёй краіне 1461 новае дрэва — столькі хвілін актывісту спатрэбілася, каб паставіць рэкорд.

Абдул — не першы рэкардсмен з Ганы. Ён пайшоў слядамі свайго земляка, які ў красавіку 2024-га паставіў сусветны рэкорд, абняўшы больш за тысячу дрэў за гадзіну. У сярэднім мужчына абдымаў 19 дрэў за хвіліну.