Андрэй Хадановіч: "Нобель" Боба Дылана — прызнанне таго, што свет змяняецца
13 кастрычніка амерыканскі рок-спявак Боб Дылан атрымаў Нобелеўскую прэмію па літаратуры. Рашэнне шведскіх акадэмікаў стала нечаканым і дыскусійным: фармальна Дылан належыць да зусім іншага віду мастацтва. Наколькі справядліва чарговы раз пакінуць без прэміі Харукі Муракамі, Адоніса, Джойс Кэрал Оўтс? А калі прыгадаць, што суперзорка сучаснай літаратуры Умберта Эка сёлета памёр, так і не дачакаўшыся "Нобеля"...
Не зважаючы на ўсё гэта, старшыня Беларускага ПЭН-цэнтра, паэт і перакладчык Андрэй Хадановіч у каментары для Еўрарадыё ацэньвае ўручэнне Нобелеўскай прэміі Бобу Дылану вельмі станоўча:
"Я вельмі рады гэтай навіне! Не думаю, што кожны год і заўсёды варта ўручаць літаратурныя ўзнагароды спевакам (і, у прыватнасці, рок-спевакам), але факт, што ў рок-культуры заўсёды былі выбітныя паэты, якія перадусім ёсць літаратурай.
Боб Дылан — тэкстацэнтрычны музыка, паэт са сваёй атмасферай, сваім пасланнем, сваёй бесшабашнасцю. Гэта па-добраму неакадэмічны крок [з боку шведскіх акадэмікаў], але разам з тым я не бачу ў гэтым ніякай лабавой папсы. Хутчэй — прызнанне таго, што свет змяняецца, і межы паміж рознымі жанрамі літаратуры і мастацтва сціраюцца і размываюцца".
Андрэй жартуе, што ён двойчы звязаны з Бобам Дыланам. Найперш, праз уласны верш "***ты ведаеш, хто такія боб дылан і дылан томас". А па-другое, праз песню польскага барда часоў "Салідарнасці" Яцэка Качмарскага "Боб Дылан", якую ён пераклаў і спявае:
Сёння а 17-й гадзіне Андрэй Хадановіч прыйдзе ў студыю Еўрарадыё, каб абмеркаваць апошнія літаратурныя падзеі: уручэнне прэміі Гедройца ў Мінску і "Нобеля", які дастаўся Бобу Дылану.
