Беларусь будзе ваяваць або папаўняць рэсурсы Расіі: эксперты пра візіт Шайгу

Улічваючы той факт, што ідзе вайна і далёка не паспяховая для Расіі, а таксама, што Крэмль не будзе падпісваць пустыя, нічога не значныя паперкі, якія не даюць доступу да вайсковага рэсурсу Беларусі, мяркую, што краіна будзе ўцягнутая ў адкрытую вайну з Украінай.

Эканаміст Яраслаў Раманчук не кажа пра поўны удзел Беларусі ў вайне, але лічыць, што мэта візіту Шайгу — прымусіць Лукашэнку ўзмацніць свой удзел у вайне.

— Яшчэ можа быць, што Шайгу дамовіўся пра вытворчасць узбраення, пра размяшчэнне заказаў на вытворчасць ракет, правіянту для войска, выкарыстанне баз Беларусі для навучання новых мабілізаваных.

Лукашэнка, вядома, баіцца. У Маскву хутчэй за ўсё і наогул у Расію ён ужо больш не паляціць. Заўважце, што ўсе губернатары з федэральных акруг едуць у Беларусь, а не наадварот. Гэта таксама цікава, таму што да гэтага ён туды лётаў з задавальненнем, — кажа Раманчук.
 

На сустрэчы з Шайгу былі не толькі вайскоўцы, але і прамыслоўцы

Падобныя версіі ў аналітыка Украінскага інстытута будучага Ігара Тышкевіча. Аднак найбольш верагоднай мэтай візіту Шайгу ён лічыць дамоўленасці аб падрыхтоўцы расійскіх мабілізаваных на беларускіх палігонах.

— Вайскоўцаў у расійскай арміі на пачатак года было каля 1 мільёна 100 тысяч. Кажуць, што цяпер рускія прызвалі каля 300 тысяч плюс салдаты тэрміновай службы восеньскага прызыву, хай яшчэ 300 тысяч. Пытанне, ці разлічаныя палігоны, каб пераварыць павелічэнне вайскоўцаў. Лукашэнка па-ранейшаму баіцца ў поўнай меры ўлазіць у вайну, але прапанаваў выкарыстанне беларускіх палігонаў.

У фотасправаздачы беларускага боку з сустрэчы бачныя не толькі людзі з міністэрстваў абароны Беларусі і Расіі. Там заўважылі Старшыню Дзяржаўнага ваенна-прамысловага камітэта Дзмітрыя Пантуса.

— Тут усё ўпіраецца ў кітайскую элементную базу [для вытворчасці беларускіх ракет. — Еўрарадыё]. Без згоды Пекіна гэта не перадасі.

Але складаем некалькі супадзенняў. Першае — прэм'ер-міністр Беларусі зрабіў візіт у Іран і Сірыю, дзе гаварылі пра прамысловае узаемадзеянне. Гэта магчымасць вырабу беспілотнікаў. Альбо мадэрнізацыя іранскіх. Беларусь актыўна шукала варыянты, з кім бы дапрацаваць ракеты, каб атрымаць ракеты сярэдняй далёкасці — каля 500 кіламетраў. Мяркуючы па тым, што Галоўчанка з'ездзіў у Іран і Сірыю, пытанне ракетнай тэхнікі я не выключаю.

І ёсць горшы варыянт — Шайгу прыехаў празандаваць глебу наконт магчымага ўдзелу беларускай арміі ў вайну супраць Украіны.

— Лукашэнка вельмі баіцца такога сцэнара, спрабуе віхляць. Не з любові да Украіны, а з любові да ўласнай улады. Сацыялогія па Беларусі паказвае, што гэта будзе практычна смяротнае рашэнне.

Мяркуючы па ўсіх прыкметах, Шайгу ўсё ж такі прыязджаў па рэсурсы і па пытаннях падрыхтоўкі мабілізаваных, але ціск на Мінск будзе працягвацца, робіць выснову Тышкевіч.