Беларуса адправілі ў калонію за выказванні пра пратэсты ў Казахстане

Беларуса адправілі на 7,5 года ў калонію ўзмоцненага рэжыму за выказванні пра пратэсты ў Казахстане. У Гродне асуджаны 34-гадовы жыхар Слоніма Аляксандр Петушкоў. Яго крымінальную справу разглядаў абласны суд (суддзя — Дзмітрый Бубенчык), піша @viasna96.

Слонімца прызналі вінаватым адразу па чатырох артыкулах Крымінальнага кодэкса: "Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх", "Распальванне расавай, нацыянальнай, рэлігійнай альбо іншай сацыяльнай варожасці або варажнечы", "Масавыя беспарадкі" і "Абраза Лукашэнкі".

Вядома, што Петушкоў быў затрыманы 12 студзеня сёлета за "негатыўную інфармацыю ў тэлеграм-чатах з нагоды падзей у Казахстане": пра пратэсты, пра змену ўлады і міратворцаў. Летам КДБ унёс Аляксандра Петушкова ў "спіс тэрарыстаў".