"Чырвоныя лініі" Пуціна: як Захад ігнаруе пагрозы і падтрымлівае Украіну

19/11/2024 - 13:55

Пуцін ігнаруе свае ж "чырвоныя лініі" / AP

Так званымі чырвонымі лініямі пуцінскі рэжым палохае Украіну і краіны Захаду з самага пачатку вайны. Гэта нейкі рубеж, які, калі перасячы, выкліча неадкладны ўдар з боку Расіі.

Аднак, як паказвае практыка, "чырвоныя лініі" часта аказваюцца толькі пустымі пагрозамі, якія не маюць рэальных наступстваў.

Еўрарадыё ўспамінае самыя вядомыя з іх.

Пастаўка заходніх узбраенняў

Захад не адразу пачаў актыўна дапамагаць Украіне. У першыя месяцы вайны яна была вымушаная абараняцца ў асноўным сваімі сіламі.

Так, паступалі некаторыя боепрыпасы з ЗША, Эстоніі, Польшчы і Францыі, але сапраўдныя сур'ёзныя пастаўкі пачаліся толькі ў канцы красавіка 2022 года.

— Мы папярэдзілі ЗША, што аркестраванае імі напампоўванне ўзбраеннямі з цэлага шэрагу краін — не проста небяспечны ход, гэта дзеянне, якое ператварае адпаведныя канвоі ў законныя мэты, — казаў намеснік міністра расійскага МЗС Сяргей Рабкоў.

Гэтую “чырвоную лінію” чыноўнік акрэсліў у сакавіку 2022 года, і з тых часоў ваенная дапамога заходніх партнёраў Украіне толькі павялічвалася.

З часам былі пастаўленыя рэактыўныя сістэмы залпавага агню HIMARS, танкі Leopard, самалёты F-16, а таксама вялікая колькасць самай сучаснай і разнастайнай тэхнікі з ЗША і Еўропы.

Выступаючы ў Валгаградзе з нагоды 80-годдзя перамогі ў Сталінградскай бітве, Пуцін прыгразіў адказам за пастаўку танкаў Украіне:

— Мы свае танкі да іх межаў не пасылаем, але ў нас ёсць чым адказаць, і прымяненнем бранятэхнікі справа не скончыцца, усе павінны гэта разумець.

Як вядома, танкі Leopard былі пастаўленыя і да сур'ёзнай эскалацыі з боку Расіі гэты факт не прывёў.

Атака на Крымскі мост

"Адзін з упоратых украінскіх начальнікаў сказаў пра неабходнасць нанесці ўдар па Крымскім мосце. Спадзяюся, ён разумее, што будзе цэллю ў адказ", — казаў у красавіку 2022 года намеснік старшыні Рады бяспекі РФ Дзмітрый Мядзведзеў.

А ўжо 8 кастрычніка Украіна нанесла ўдар па мосце і пашкодзіла яго, ніякай сур'ёзнай рэакцыі пасля гэтага не было.

Удары па Маскве

У маі 2023 года Украіна ўпершыню атакавала расійскую сталіцу. Адзін з беспілотнікаў, верагодна, запушчаны з Падмаскоўя, урэзаўся ў Крэмль. Сур'ёзных наступстваў не было, але расійскі СК усё роўна на ўсялякі выпадак завёў тады крымінальную справу.

Гэта стала першым выпадкам, калі жыхары Масквы адчулі сябе датычнымі да паўнавартаснай вайны.

Прэс-сакратар Пуціна Дзмітрый Пяскоў заявіў, што да нападу датычныя ЗША, а Украіна толькі выканаўца, а мэтай самой атакі была фізічная ліквідацыя Пуціна. Таксама ён сказаў, што ў Расіі ёсць некалькі варыянтаў адказу.

А Дзмітрый Мядзведзеў заклікаў і ўвогуле ліквідаваць Уладзіміра Зяленскага.

Па сутнасці, Пуціну адказаць не было чым — Расія і так кожны дзень наносіць удары па тэрыторыі Украіны. Да сапраўды сур'ёзнай эскалацыі гэта не прывяло. Пазней налёты ўкраінскіх беспілотнікаў на Маскву сталі рэгулярнымі.

Удары па Крыме ракетамі далёкага дзеяння

У верасні 2023 года Украіна нанесла ўдары па Крыме дальнабойнымі брытанскімі ракетамі Storm Shadow. Удар прыпаў на сударамонтны завод і пашкодзіў некалькі караблёў.

За тры месяцы да гэтага колішні міністра абароны РФ Сяргей Шайгу казаў:

— Ужыванне гэтых ракет [Storm Shadow] па-за зонай правядзення спецыяльнай ваеннай аперацыі будзе азначаць паўнавартаснае ўцягванне ЗША і Вялікабрытаніі ў канфлікт і пацягне неадкладныя ўдары па цэнтрах прыняцця рашэнняў на тэрыторыі Украіны.

Расія не лічыць Крым "зонай СВА", аднак Украіна ўсё роўна рэгулярна абстрэльвае яго дальнабойнымі ракетамі. Не складана здагадацца, што словы Шайгу так і засталіся словамі.

Дазвол Байдэна біць ракетамі ATACMS па РФ

New York Times са спасылкай на амерыканскіх чыноўнікаў заявіла, што Джо Байдэн дазволіў Украіне атакаваць тэрыторыі Расіі ракетамі ATACMS.

Дазвол выкарыстоўваць ракеты вялікай далёкасці стаў адказам на рашэнне агрэсара прыцягнуць войскі КНДР для вайны супраць Украіны. Гэтае рашэнне стане папярэджаннем Пхеньяну, каб ён не пасылаў больш сваіх вайскоўцаў.

Упершыню Украіна афіцыйна паведаміла, што атрымала ATACMS і паспяхова іх ужыла ў кастрычніку 2023 года.

А раніцай 19 лістапада ўкраінскія СМІ паведамілі пра паразу расійскага арсенала ў Бранскай вобласці ракетамі ATACMS. Гэта адбылося ўпершыню пасля таго, як ЗША далі дазвол на гэта.

У верасні 2024 года Пуцін выказваўся пра магчымыя ўдары Украіны па Расіі і зноў не абышлося без пагроз:

— Гаворка і дзе пра тое, каб прыняць рашэнне пра тое, што краіны NATO наўпрост удзельнічаюць у ваенным канфлікце або не. Калі гэтае рашэнне будзе прынятае, гэта будзе азначаць не што іншае, як наўпроставы ўдзел краін NATO, Злучаных Штатаў, еўрапейскіх краін у вайне.