Кіраўнік Нямецкай медыцынскай асацыяцыі Клаўс Райнард прапанаваў увесці ў краіне частковы бальнічны. Ідэя такая: калі работнік хворы, але не моцна, то ён мог бы ўзяць бальнічны, напрыклад, на 4 гадзіны, а потым яшчэ некалькі гадзін папрацаваць з дому. На думку чыноўніка, гэта б дазволіла павялічыць прадукцыйнасць працы, а яшчэ зэканоміць на сацыяльных выплатах [у Германіі супрацоўнік на поўным бальнічным можа атрымліваць свой поўны заробак да шасці тыдняў].
На прапанову адрэагавалі ў Федэрацыі прафсаюзаў Германіі. На думку спецыялістаў, калі чалавек захварэў, ён павінен нармальна адпачыць і цалкам вылечыцца, а не працаваць — хай і не ўвесь дзень. Эканоміць на здароўі людзей недапушчальна, асабліва калі многія немцы і так працягваюць працаваць нават пры дрэнным самаадчуванні.
Ад жартаў да ДНК-тэсту
У паўночным Кітаі дзяўчына выпадкова даведалася, што з'яўляецца прыёмным дзіцем.
Калегі пастаянна жартавалі з яе, заўважаючы, што яна не падобная на мясцовую жыхарку. Яны казалі, што шырокі нос, вялікія вочы і вусны — гэта, хутчэй, адметныя рысы паўднёўцаў.
Дзяўчына паспрабавала даведацца ў бацькоў, чаму яе параўноўваюць з жыхарамі поўдня Кітая, але тыя нічога не патлумачылі. Тады яна зрабіла ДНК-тэст і даведалася, што жыве ў прыёмнай сям'і.
Гісторыю актыўна абмяркоўвалі ў сацсетках, пасля чаго жанчына з паўднёвай правінцыі Гуансі звязалася з журналістамі і заявіла, што дзяўчына можа быць яе страчанай дачкой.
— Я гляджу на яе і адчуваю, што яна ва ўсім падобная на маю дачку, але я ніколі не бачыла яе пасля нараджэння. Я адчула велізарны боль пасля родаў і плакала перад мужам кожны дзень, пытаючыся сябе, куды знікла мая дачка, — расказала жанчына.
Яе сын і дзяўчына аказаліся даволі падобнымі, таму сям'я паедзе на поўнач краіны, каб ва ўсім разабрацца.
Дзіця за 150 долараў
Пакуль у Кітаі жанчына з нецярпеннем чакае сустрэчы са сваёй імавернай дачкой, 21-гадовая маці з Тэхаса ледзь не прадала сваё нованароджанае дзіця.
