Генацыд — тут, патрыятызм — там: як ідэалогія пранікае ў школьныя прадметы

Але пра "генацыд" будуць "даводзіць да ведама навучэнцаў" і ў рамках дапрызыўной падрыхтоўкі. І ў рускай мове і літаратуры:

"Тэма Вялікай Айчыннай вайны неаддзельная ад праблемы генацыду. Бязлітаснае знішчэнне народа, пакуты простых людзей адлюстраваныя ў многіх творах. [ ... ] На ўроках і ў пазаўрочнай рабоце неабходна выкарыстоўваць інфармацыйна-аналітычныя матэрыялы, падрыхтаваныя Генеральнай пракуратурай Рэспублікі Беларусь".

Знайшлі месца для працы Генпракуратуры нават у школьным прадмеце "Мастацтва".

"У змесце вучэбнага прадмета "Мастацтва (айчынная і сусветная мастацкая культура)" (V–IX класы) адлюстраваная тэма генацыду беларускага народа ў перыяд Вялікай Айчыннай вайны", — пазначана ў рэкамендацыях.

Распавядаць пра "генацыд" павінны нават на замежных мовах.

Раўнуйся! Зважай!

Дапрызыўная падрыхтоўка акрамя расповедаў пра генацыд павінна імітаваць армейскае жыццё. Напрыклад, чыноўнікі рэкамендуюць называць класы "ўзводамі", адбіраць хлопцаў на ролю камандзіраў, а ўрокі пачынаць з пастраенняў.

А мэты ўрокі па дапрызыўной і медыцынскай падрыхтоўцы, на думку чыноўнікаў, маюць такія:

"...у свядомасці маладых людзей павінна быць сфарміраванае пазітыўнае стаўленне і ўстойлівая матывацыя да службы ва Узброеных Сілах і іншых органах сістэмы забеспячэння нацыянальнай бяспекі".

Патрыятызм, усюды патрыятызм

У многіх метадычных рэкамендацыях пішуць пра выхаванне патрыятызму. Напрыклад, настаўнікі павінны займацца гэтым на ўроках замежнай мовы:

"У 2023/2024 навучальным годзе актуальнымі застаюцца фарміраванне ў вучняў пачуцця патрыятызму, грамадзянскасці, павагі да гістарычнага мінулага, стваральнай працы як галоўнай умовы развіцця беларускай дзяржавы".

У некалькіх прадметах — напрыклад, "Грамадазнаўстве" і "Гісторыі" — рэкамендуюць адбіраць матэрыял менавіта для выхавання патрыятызму.

"Вывучаны на ўроку навучальны матэрыял павінен паказваць узоры маральнасці, патрыятызму, духоўнасці, грамадзянскасці, гуманізму", — пішуць у рэкамендацыях, забываючы ўдакладніць, што дзяцей трэба вучыць гістарычным фактам ва ўсіх праявах, а не "ўзорам патрыятызму".