Ідэолаг Мінабароны РБ звязаў гульню Pokémon Go са “зборам разведінфармацыі”
Контрразведка супраць Pokémon Go / pixabay.com
Начальнік аддзела Галоўнага ўпраўлення ідэалагічнай працы Мінабароны Беларусі Аляксандр Іваноў звязаў гульню Pokémon Go са “зборам разведінфармацыі”. Прагучала гэта ў эфіры тэлеканала СТБ.
"Мы зусім не ўлічваем гульнявую форму, — гаварыў Іваноў, разважаючы пра цікавасць да РБ замежных разведслужбаў. — І казаць пра тое, што цікавасць вось зараз прачнуўся, а раней яе не было, я б не быў так катэгарычны. Давайце возьмем гульню Pokémon Go, так? Гадоў там 10 таму яна была вельмі папулярная. У чым заключаўся сэнс? Усе падлеткі, дзеці сядзелі на нейкім дадатку, уключаеш камеру, дапоўненая рэальнасць, і шукаеш нейкіх пакемонаў рэдкіх, збіраеш у калекцыю. Дзе было больш за ўсё пакемонаў у той час, як вы думаеце? На тэрыторыі 50-й авіяцыйнай базы [у Мачулішчах пад Мінскам], дзе ўзлётна-пасадачная паласа, дзе куча ваеннай тэхнікі авіяцыйнай, там больш за ўсё было пакемонаў. Гэта не разведінфармацыя?".
Як бачым, прапагандысты шукаюць усё новых і новых ворагаў. Прычым у самых нечаканых месцах.
