Каля 50 спецыяльнасцяў закрыюць у беларускіх ВНУ

У новым навучальным годзе ў беларускіх ВНУ будуць скасаваныя 50 спецыяльнасцяў, аднак з'явяцца і новыя. Пра гэта дзяржтэлеканалу СТБ расказаў міністр адукацыі Андрэй Іванец.

Чыноўнік назваў гэта работай па "адмове ад няпрофільнай падрыхтоўкі".

"Каб кожны ўніверсітэт разумеў, якіх спецыялістаў ён рыхтуе, у чым ён спецыялізуецца, дзе ён мае добрую навуковую школу, прафесарска-выкладчыцкі склад. У сувязі з гэтым мы працягнем работу па стварэнні цэнтраў кампетэнцый на базе ўніверсітэтаў, два з якіх былі створаны летась", — удакладніў ён.

Іванец назваў некаторыя з новых спецыяльнасцяў, якія адкрыюцца ў ВНУ ў новым навучальным годзе. У БДУ з'явіцца "інтэлектуальная электроніка": там будуць рыхтаваць спецыялістаў для галіны мікра- і нанаэлектронікі. У Магілёўскім універсітэце хімічных і харчовых тэхналогій з'явіцца спецыяльнасць, звязаная з харчовай бяспекай. А ў Магілёўскім дзяржуніверсітэце пачнуць рыхтаваць спецыялістаў па спецыяльнасці "фізічная культура, ваенна-патрыятычнае выхаванне".

Год таму, у лютым 2024-га, Лукашэнка загадаў "страсянуць ВНУ", каб студэнты "не беглі" за мяжу. Ад універсітэтаў ён запатрабаваў рыхтавацьі выпускнікоў найперш пад патрэбу айчыннага рэальнага сектара.

Таксама Іванец расказаў пра закрыццё прыватных дзіцячых садкоў і школ, для якіх у 2022 годзе ўвялі ліцэнзаванне. Ён заявіў, што гэта было зроблена, каб ва ўсіх установах адукацыі была "адзіная адукацыйная праграма, якая адпавядае нашым дзяржаўным стандартам".

"Найбольшая колькасць так званых прыватных школ была ў горадзе Мінску, Мінскай вобласці — іх было каля 50. Хацеў бы адзначыць, толькі толькі палова з іх да прыняцця закона аб ліцэнзаванні ўвогуле заяўлялі пра тое, што яны вядуць адукацыйную дзейнасць", — адзначыў чыноўнік.

Цяпер, паводле яго, працягваюць працу толькі сем установаў прыватнай формы.