Каля ўчасткаў для галасавання пачалі дзяжурыць дружыннікі

Каля ўчасткаў для галасавання пачалі дзяжурыць дружыннікі. Улады палічылі, што іх дапамога сілавікам будзе не лішняя.

Як вядома, міліцыя пераведзена на ўзмоцнены варыянт нясення службы. Сілавікі адказваюць за бяспеку на выбарчых участках і каля іх. У Ашмянскім раёне Гродзенскай вобласці на дапамогу міліцыі прыцягнулі шэсць "добраахвотных дружын": пяць створаны з працаўнікоў мясцовых прадпрыемстваў і арганізацый (ЖКГ, раённая ветэрынарная станцыя, сыраробчы завод, ААТ "Будаўнік" і "Белкофе") і адна "маладзёжная" — з навучэнцаў аграрна-эканамічнага каледжа.

"На гэтым этапе перад намі пастаўлена задача забяспечваць правапарадак паблізу участкаў для галасавання, — распавядае ў каментары раённай газеце "добраахвотнік" Уладзімір Максуль. — Кожны з нас ўсведамляе важнасць гэтай місіі".

Верагодна, "добраахвотныя дружыны" прыцягнулі да дзяжурстваў каля выбарчых участкаў і ў іншых раёнах. Напрыклад, у Хойніках для дапамогі міліцыянтам на выбарчых участках стварылі 7 "добраахвотных дружын" па 2 чалавекі ў кожнай. У сталіцы "дружыннікі" МТЗ дапамагаюць міліцыянтам каля шасці выбарчых участкаў у Партызанскім раёне.