Лебедзі лётаюць налева. Як падаражэе шэнген? — #ІхНоравы

07/06/2024 - 13:47

Замежныя навіны / @rubanau_collage

Лебядзіная вернасць — міф. Пра гэта кажуць даследчыкі, якія назіралі за чорнымі лебедзямі на працягу 18 гадоў. А тым часам іншыя навукоўцы расказваюць, што калі трапічныя цыклоны праз глабальнае пацяпленне будуць узмацняцца, некаторыя віды марскіх птушак знікнуць з паверхні зямлі.

У свеце жывёл — добрыя навіны. У ЗША тром аслам, адзін з якіх стаў прататыпам героя папулярнага мультфільма "Шрэк", выдзеляць на ўтрыманне 10 тысяч долараў.

Людзям пакуль не шанцуе ані — ні грошай з неба, ні крылаў за спіной. А з 11 чэрвеня яшчэ і шэнгенскія візы падаражэюць.

Падрабязней пра гэта чытайце ў традыцыйнай рубрыцы Еўрарадыё "Іх норавы".

Цыклоны забіваюць марскіх птушак

Узмацненне трапічных цыклонаў праз глабальнае пацяпленне можа прывесці да рэзкага скарачэння папуляцый марскіх птушак. Моцныя вятры, праліўныя дажджы і велізарныя хвалі парушаюць іх цыклы размнажэння.

Навукоўцы выявілі, што пасля таго, як цыклон Ільза (трапічны цыклон 5-й катэгорыі) абрынуўся на востраў Бедаут ў заходняй Аўстраліі ў красавіку 2023 года, некалькі папуляцый марскіх птушак практычна зніклі.

— Больш за 20 тысяч птушак загінулі ў імгненне вока, — расказвае доктар Джэніфер Лаверс, навуковая супрацоўніца Музея гісторыі прыроды. — Абследаванні вострава на працягу трох месяцаў ясна паказваюць, што аднаўленне будзе павольным і, верагодна, перапыніцца яшчэ адным цыклонам.

— Смяротнасць, якую мы назіраем, беспрэцэдэнтная, — кажа яшчэ адзін даследчык, доктар Алекс Бонд. — Цыклон абрынуўся ў красавіку, гэта досыць пікавы час, калі гнездавалася мноства марскіх птушак. Мы змаглі правесці падлік целаў і выявілі, што практычна ўсіх карычневых олуш і амаль усіх олуш у масках забіў цыклон Ільза.

Марскія птушкі маюць вырашальнае значэнне для падтрымання трапічных рыфаў, і навукоўцы папярэджваюць, што знікненне птушак можа выклікаць далейшы заняпад экасістэм.

Лебедзі здольныя на здрады

Працягваем навіны з птушынага свету. Навукоўцы Мельбурнскага універсітэта развеялі міф пра лебядзіную вернасць! Чорныя асобіны не заўсёды ўсё жыццё жывуць з адным і тым жа партнёрам, а часам нават разыходзяцца ўсяго праз месяц адносін.

Лебеди летают налево. Как подорожает шенген? — #ИхНравы

Baron Park Donkeys / Instagram

Гэта асёл па мянушцы Пэры, які жыве ў Бэран-парку. 9 чэрвеня яму споўніцца 30 гадоў. З узростам асёл пачаў часцей хварэць, таму выраслі выдаткі на ветэрынарныя паслугі. На ўтрыманне асла і двух яго суродзічаў Эйпрыл і Бадзі штогод патрабуецца 40 тысяч долараў. Уладальнікі парку кажуць, што знаходзяцца ў крытычным становішчы.

Каб дапамагчы аслам, гарадскія ўлады вырашылі выдаць аднаразовы грант у памеры 10 тысяч долараў. Для гэтага яны адкрылі збор, бо такая сума для адміністрацыі невялікага населенага пункта занадта вялікая. На гэты момант удалося сабраць чатыры тысячы долараў. Збор працягнецца да 23 чэрвеня.

— Сёлета ў нас дэфіцыт, ён будзе і ў наступным годзе. Мне гэта проста падаецца безадказным, таму я гэта не падтрымліваю і не думаю, што нам варта рабіць гэта прама цяпер, калі мы і так бяднеем, — заявіў член савета Грэг Танака, які негатыўна ўспрыняў дабрачынную ідэю.

Аслы ў Бэран-парку жывуць з 1950-х гадоў. За гэты час яны сталі ўлюбёнцамі пакаленняў сем'яў, якія пражываюць паблізу. На думку мэра Пала-Альта Грыра Стоўна, зносіны з гэтымі жывёламі радуюць дзяцей, далучаюць іх да прыроды, а таксама паляпшаюць дабрабыт, таму важна ім дапамагчы.

Шэнген падаражэе

З 11 чэрвеня павышаецца кошт кароткатэрміновай шэнгенскай візы. Віза падаражэе на 12%. Збор за афармленне вырасце з 80 да 90 еўра для дарослых і з 40 да 45 еўра для дзяцей.

Ва ўсім вінаватая інфляцыя ў краінах, якія ўваходзяць у Шэнгенскую зону.

У Бруселі ўдакладняюць, што зборы ўсё яшчэ застаюцца "адносна нізкімі", калі параўноўваць з коштам віз у іншыя краіны. Напрыклад, віза ў Вялікабрытанію каштуе 134 еўра, у ЗША — каля 185 еўра, а ў Аўстралію — 117 еўра.

Да краін Шэнгенскай зоны адносяцца дзяржавы-сябры ЕС, акрамя Ірландыі і Кіпра, а яшчэ Балгарыя і Румынія. Нарвегія, Ісландыя, Ліхтэнштэйн і Швейцарыя, хоць і не з'яўляюцца сябрамі ЕС, таксама ўваходзяць у Шэнгенскую канвенцыю.