Багацеі, галодныя дзеці і бясстрашны акунь на антыдэпрэсантах — #ІхНоравы

06/06/2024 - 15:27

Замежныя навіны / @rubanau_collage

У 2023 годзе ў свеце стала больш багатых людзей, але гэта не значыць, што грошы ратуюць свет. Па звестках ААН, кожнае чацвёртае дзіця на планеце харчуецца зусім дрэнна і "жыве на мяжы".

Пакутуе дзікая прырода — праз адходы медыцынскіх прэпаратаў рыбы мяняюць пол, а птушкі страчваюць розум. Тым часам актывісты ратуюць "сумныя і брыдкія" тэлефонныя будкі ў Англіі, Шатландыі і Уэльсе.

Падрабязней пра гэта чытайце ў пастаяннай рубрыцы Еўрарадыё "Іх норавы".

Багатых стала больш

Колькасць багатых людзей у свеце павялічылася на 5%. Пра гэта кажуць дадзеныя справаздачы міжнароднай кансалтынгавай кампаніі Capgemini за 2023 год.

За эталон багатага чалавека эксперты ўзялі людзей з маёмасцю ад $1 млн. Паводле звестак Capgemini, іх агульнае багацце вырасла і склала амаль 87 трлн долараў. Самы высокі рост зафіксаваны ў Паўночнай Амерыцы. У гэтым рэгіёне памеры маёмасці за год павялічыліся на 7,2%, а колькасць мільянераў і мільярдэраў — на 7,1%.

Спецыялісты лічаць, што зменам спрыялі эканамічная ўстойлівасць і стабільнасць, а таксама рост фондавага рынку ЗША.

Пры гэтым у Афрыцы багатых людзей стала менш. Аўтары даследавання звязваюць гэта з "падзеннем цэн на сыравіну і скарачэннем замежных інвестыцый".

Справаздача Capgemini заснаваная на звестках з 71 краіны, дзе засяроджваецца больш за 98% сусветнага валавога нацыянальнага даходу. У апытанні прынялі ўдзел больш за 3 тысячы багатых людзей свету.

Дзецям пагражае голад

Даследчыкі б'юць трывогу — кожнае чацвёртае дзіця ў свеце харчуецца настолькі дрэнна, што гэта можа нанесці шкоду яго росту і развіццю мозгу. Такая сітуацыя пагражае павелічэннем выпадкаў дзіцячай смяротнасці.

Многія дзеці жывуць у раёнах, якія ААН вызначыла як "гарачыя кропкі голаду", уключаючы Палестыну, Гаіці і Малі.

У дакладзе дзіцячага агенцтва ААН ЮНІСЕФ, прысвечаным ацэнцы рацыёну харчавання дзяцей ва ўзросце да пяці гадоў, гаворыцца, што каля 181 мільёна чалавек з амаль 100 краін свету штодня спажываюць не больш за дзве групы прадуктаў харчавання. Звычайна гэта малако з крухмалістымі прадуктамі, такімі як рыс, кукуруза ці пшаніца.

Па словах выканаўчага дырэктара ЮНІСЕФ Кэтрын Расэл, статыстыка кажа аб "вострай харчовай беднасці" і прыводзіць да высновы, што многія дзеці ў нашым свеце сёння "жывуць на мяжы".

Акунь губляе страх да драпежнікаў праз антыдэпрэсанты

Навукоўцы заявілі, што сучасныя фармацэўтычныя адходы сур'ёзна ўплываюць на дзікую прыроду. Напрыклад, самкі шпакоў, якія атрымліваюць антыдэпрэсанты са сцёкавых вод, становяцца менш прывабнымі для патэнцыйных партнёраў. А птушкі-самцы паводзяць сябе больш агрэсіўна і менш спяваюць, каб спакусіць іх.

Еўрапейскі акунь праз лекі ад дэпрэсіі губляе страх перад драпежнікамі. У некаторых папуляцыях адходы супрацьзачаткавых лекаў выклікалі ў рыб змяненне полу, што прывяло да змяншэння іх колькасці або лакальнага вымірання.

— Актыўныя фармацэўтычныя інгрэдыенты сустракаюцца ў водных пуцях па ўсім свеце, у тым ліку ў арганізмах, якімі мы можам харчавацца, — папярэджвае дацэнт Шведскага універсітэта сельскагаспадарчых навук Майкл Бертрам.

У навакольнае асяроддзе хімікаты трапляюць праз неадэкватнае абыходжанне з прэпаратамі падчас вытворчасці і праз сцёкавыя воды, куды трапляюць экскрэменты людзей, якія утрымліваюць рэшткі ў тым ліку і наркатычных рэчываў.

Актывісты ратуюць тэлефонныя будкі

Пачалася кампанія па выратаванні "сумных і брыдкіх" тэлефонных будак 80-х гадоў. Яе ўдзельнікі называюць канструкцыі "фінальным росквітам тэлекамунікацыйнай інфраструктуры ў грамадскай сферы".

Актывісты дамагаюцца захавання хаця б некалькіх экземпляраў гэтых будак у Англіі, Шатландыі і Уэльсе перш, чым іх знімуць з уліку ў наступным годзе.

Безаблічныя канструкцыі са шкла і сталі, якія газета Guardian назвала "цалкам безгустоўнымі, сумнымі і брыдкімі", выкарыстоўваліся з 1985 года. Яны замянілі сабой тысячы чырвоных кабін для тэлефонных размоў, распрацаваных сэрам Джайлсам Гілбертам Скотам.

У той час боксы рэкламаваліся як антывандальныя, прасторныя і даступныя для інвалідных калясак. Паколькі шкляныя дзверы не даходзілі да зямлі, іх было лягчэй мыць і яны з меншай верагоднасцю пахлі мачой, што стала адметнасцю чырвоных будак.