Мінінфармацыі прыпыніла дзейнасць тыпаграфіі Беларускага таварыства інвалідаў

Міністэрства інфармацыі паведамляе, што прыпыніла дзеянне пасведчання аб рэгістрацыі друкарні Беларускага таварыства інвалідаў. Забарона на працу дзейнічае пакуль адзін месяц, пачынаючы з 17 кастрычніка.

У заяве Мінінфарма гаворыцца, што быў парушаны пункт 3 артыкула 28 Закона Рэспублікі Беларусь "Аб выдавецкай справе". У гэтым пункце гаворыцца, што ў выпадку змены інфармацыі, "якая падлягае ўключэнню ў Дзяржаўны рэестр выдаўцоў, вытворцаў і дыстрыб'ютараў, <....> выдавец, вытворца і дыстрыб'ютар на працягу месяца з дня змены звестак інфармуюць пра гэта ў пісьмовай форме Міністэрства інфармацыі Рэспублікі Беларусь з падаваннем дакументаў, якія пацвярджаюць адпаведныя змены".