“Падыходзіць да мяне і цісне руку”: Вячорка пра сустрэчу з кіраўніком МЗС РБ
Сяргей Алейнік у ААН / mfa.gov.by
Кіраўнік МЗС Сяргей Алейнік на Генасамблеі ААН у Нью-Ёрку паціснуў руку Франку Вячорку. Пра гэта дарадца Святланы Ціханоўскай расказаў у эфіры Еўрарадыё:
“Дзіўная сітуацыя, нечаканая для мяне. Падыходзіць да мяне Алейнік і паціскае руку. Ён, вядома, паставіў мяне ў ступар, бо летась дэлегацыя Макея ўцякала ад нас. Гэтым разам яны самі падышлі. Размовы не было, гэта было проста вітанне. Разам з ім быў Глаз [прэс-сакратар МЗС. — Еўрарадыё] і шэраг іншых чыноўнікаў. Але гэта ўся камунікацыя, што была.
Зразумела, што яны працуюць на варожыя сілы — рэжым Лукашэнкі. Відавочна, не варта чакаць, што яны вырашаць перайсці на бок свабоднай Беларусі. Але я думаю, што яны прызнаюць нас як апанентаў. І нашая задача — іх проста перамагчы”.
Кіраўніца Аб'яднанага пераходнага кабінета Беларусі знаходзіцца ў ЗША з тыднёвым візітам. Яна возьме ўдзел у мерапрыемствах Генасамблеі ААН.
