"Паштальён, які дастаўляе песні". 9 фактаў пра Боба Дылана

Славуты амерыканскі музыка Боб Дылан сёння атрымаў Нобелеўскую прэмію па літаратуры "за стварэнне новай паэтычнай мовы ў межах вялікай амерыканскай песеннай традыцыі". Цікава, што летась сярод намінантаў таксама было яго імя, аднак тады перамогу атрымала беларуская пісьменніца Святлана Алексіевіч.

Цікавыя факты пра Боба Дылана:

1. Боб Дылан (Роберт Ален Цымерман) з'яўляецца на свет у штаце Мінесота ў 1941 годзе ў яўрэйскай сям'і. Яго продкі па мужчынскай лініі — выхадцы з Адэсы: бабуля і дзядуля Цымерманы пакінулі горад у 1905 годзе ў сувязі з яўрэйскімі пагромамі. Продкі па жаночай лініі — Эдэнштэйны, яўрэі з Літвы, эмігравалі ў ЗША ў 1902 годзе.

2. Калі Дылан упершыню прыязджае ў Н'ю-Ёрк, яго папракаюць кепскім валоданнем гітарай, выкананнем каўбойскіх песень з вясковым акцэнтам і ігнараваннем канонаў фолк-музыкі. За гэта яго называюць "немузычным спеваком". Але мужныя, страсныя і суровыя песні Дылана, якія з'явіліся ў 60-х гадах падчас ўздыму руху за грамадзянскія правы і пратэстаў супраць в'етнамскай вайны, робяць сваю справу: Дылан становіцца зоркай.

3. Сапраўдная папулярнасць да Боба Дылана прыходзіць у 1962 годзе. Музыка выпускае альбом "The Freewheelin’ Bob Dylan", у якім заяўляе пра сябе, як пра сапраўднага паэта. Тут ёсць гімн "Blowin' in the Wind", песня пратэста "Masters of War", апісанне ядзернага кашмару "A Hard Rain's a-Gonna Fall", "Oxford Town" пра барацьбу цемнаскурых у штаце Місісіпі. Альбом становіцца рэвалюцыйным не толькі ў сацыяльным, але і ў музычным плане. Музыка мяняе прыроду папулярнай песні, ламае яе структуру і фармат. Цяпер песня можа быць бясконцай, туманнай і загадкавай.

4. З альбомамі "Bringing It All Back Home" (1965) у стылі фолк-рок і дзвюма рокавымі кружэлкамі — "Highway 61 Revisited" (1965) і "Blonde on Blonde" музыка пераходзіць у рок-музыку. Але такі крок адварочвае многіх прыхільнікаў Дылана, якім падабаўся яго пратэстны фолк. На адным з канцэртаў у Манчэстары натоўп крычыць музыку: "Іуда".

5. У 1966 годзе Дылан трапляе ў аварыю на матацыкле каля свайго дома пад Вудстокам. Ламае некалькі шыйных пазванкоў, атрымлівае сатрасенне мозга і рваныя раны твару, тыдзень знаходзіцца ў крытычным стане, потым месяц прыкаваны да ложку. Наступствамі аварыі становіцца амнезія і частковы параліч. На публіцы з'яўляецца толькі праз дзевяць месяцаў, і тое рэдка.

6. У 1965 годзе Дылан бярэ шлюб з мадэлью Сарай Лаўндс у прысутнасці толькі двух сведак, а пасля доўга адмаўляе факт ўступлення ў шлюб. Мужа і жонку рэдка ўдаецца сфатаграфаваць разам. Аднойчы музыка хавае жонку ў сваім гардэробе за кулісамі канцэртнай залы ў Ванкуверы, пачуўшы набліжэнне вядучых канцэрта. У 1986 годзе Дылан жэніцца са сваёй бэк-вакалісткай Кэрал Дэніс. Пра гэты шлюб ніхто не ведае ажно да 2001 года, але пара ўжо дзевяць гадоў як знаходзіцца ў разводзе. 

7. Боб Дылан — мастак, які пачаў маляваць яшчэ ў дзяцінстве. Упершыню свае працы прадставіў некалькі гадоў таму. Іх выстаўлялі буйнейшыя музеі Капенгагена, Нью-Ёрка, Мілана і Лондана. Апроч таго, Дылан працуе з металам. Яго працы называюць "марамі Дылана з сталі і жалеза".

8. У 1978 годзе наноў адкрывае для сябе ісціны хрысціянства. Піша альбом з Маркам Нофлерам "Slow Train Coming", дзе пераважаюць песні рэлігійнай тэматыкі. У іх ён крытыкуе парнаграфію і прастытуцыю, але гэта падабаецца далёка не ўсім. У адказ на дыланаўскую "Gotta Serve Somebody" ("Трэба служыць некаму") Джон Ленан піша "Serve Yourself" ("Служы сабе самому").

9.Гастралюючы, Дылан ігнаруе дарагія раскошныя гатэлі, спыняючы свой выбар на бюджэтных варыянтах. Сярод капрызаў — ён прымушае па раніцах здымаць з ложка пасцельную бялізну. Дарэчы, заўсёды можна набыць ужываную Дыланам прасціну на Ebay.

Боб Дылан — аўтар больш за 40 альбомаў, уладальнік дзевяці прэмій "Грэмі", зоркі ў Зале славы рок-н-ролу, Пулітцэраўскай прэміі за ўплыў на поп-музыку і амерыканскую культуру (атрымаў у 2008 годзе), прэмій "Залаты глобус" і "Оскар" за лепшы саўндтрэк да фільма "Вундэркінды" Кёрціса Хэнсана. Аўтар неўміручых хітоў "Blowin’ In The Wind", "Make You Feel My Love", "Knockin’ On Heaven’s Door" — песня дала назву знакамітай нямецкай кінастужцы Томаса Яна "Дагрукацца да нябёсаў". Дылана называюць "Робінам Гудам ХХ стагоддзя", "Шэкспірам свайго пакалення", ён жа пра сябе кажа так:

"Я паштальён, які дастаўляе песні".

Музыка не лічыць сябе паэтам, бо яму не падабаецца гэтае слова:

"Лічыце мяне гімнастам на трапецыі... Я ніколі не хацеў стаць прарокам альбо выратавальнікам. Магчыма, я хацеў стаць Элвісам. Я вельмі лёгка ўяўляю сябе на яго месцы. Але прарокам — не, ніколі".