Нобелеўская прэмія па літаратуры — у пісьменніцы Хан Ган з Паўднёвай Карэі
Хан Ган / Getty Images
Нобелеўскую прэмію па літаратуры за 2024 год атрымала пісьменніца Хан Ган з Паўднёвай Карэі.
Нобелеўскі камітэт патлумачыў, што ўзнагародзіў пісьменніцу "за яе насычаную паэтычную прозу, якая супрацьстаіць гістарычным траўмам і раскрывае далікатнасць чалавечага жыцця".
Хан Ган нарадзілася ў 1970 годзе ў паўднёвакарэйскім горадзе Кванджу, а ва ўзросце дзевяці гадоў пераехала з сям'ёй у Сеул. Яе бацька быў вядомым раманістам.
Хан Ган не толькі пісьменніца, а яшчэ і мастачка і музыка, што знайшло адлюстраванне ў яе літаратурных творах.
У 2016 годзе пісьменніца стала лаўрэаткай Букераўскай прэміі за раман "Вегетарыянка".
