Праўладны Саюз пісьменнікаў хоча прыняць Лукашэнку ў свае шэрагі
Аляксандр Лукашэнка / GETTY IMAGES
У праўладным Саюзе пісьменнікаў Беларусі (СПБ) прапанавалі выдаць збор выбраных твораў Аляксандра Лукашэнкі, піша "Позірк".
Такую ідэю на прэс-канферэнцыі 11 чэрвеня ў Мінску агучыў Валерый Шумілаў, які назваўся "навуковым публіцыстам". Таксама ён прапанаваў прыняць Лукашэнку ў СПБ, "улічваючы публіцыстычную дзейнасць".
Ідэю з выданнем збору твораў Лукашэнкі падтрымаў старшыня СПБ Аляксандр Карлюкевіч. А ганаровы старшыня арганізацыі Мікалай Чаргінец прапанаваў дзейнічаць праз адміністрацыю Лукашэнкі: "Да гэтага пытання трэба ўмела падысці. Трэба, каб у Адміністрацыі яму падалі гэтую ідэю, сказалі: Аляксандр Рыгоравіч, бярыцеся за кнігі — яны вельмі патрэбныя народу".
Паводле яго, СПБ "будзе рады" падтрымаць Лукашэнку ў гэтай дзейнасці.
