Расійскі віцэ-прэм'ер заклікае не палітызаваць якасць нафты, што ідзе ў Беларусь
Праблема якасці нафты, якая ідзе ў Беларусь па нафтаправодзе "Дружба", мае тэхнічны характар і не павінна палітызавацца. З такой заявай перад журналістамі выступіў віцэ-прэм'ер Расіі Дзмітрый Козак, перадае ТАСС.
"Гэта тэхнічная праблема, яе не трэба палітызаваць, перыядычна такое здараецца", — заявіў чыноўнік. Ён дадаў, што на гэты раз гранічна дапушчальная канцэнтрацыя шкодных рэчываў апынулася істотна вышэйшай, чым раней.
Козак паведаміў, што 26 красавіка ў Мінску пройдзе чатырохбаковая нарада з удзелам Расіі, Беларусі, Польшчы і Украіны. На ёй будзе вырашацца пытанне пра адпампоўку няякаснай нафты, якая яшчэ ёсць у трубаправодзе "Дружба".
Віцэ-прэм'ер паабяцаў, што кампаніі, вінаватыя ў пагаршэнні якасці нафты і іх менеджмент панясуць адказнасць, у тым ліку фінансавую. Козак патлумачыў, што на кропцы ўваходу, дзе адбылося забруджванне нафты, працуюць чатыры здабываючыя кампаніі. "Працуюць праваахоўныя органы, бо шкода істотная і для нашых нафтаперапрацоўчых заводаў, і для нашых партнёраў, і для самой "Транснафты", — дадаў ён.
Як паведамлялася раней, на мінулым тыдні з Расіі ў Беларусь пачаліся пастаўкі няякаснай нафты. З гэтай прычыны на Мазырскім НПЗ, напрыклад, было сапсаванае дарагое абсталяванне. 24 красавіка пра няякасную нафту з расійскага нафтаправода заявілі таксама Польшча і Германія.
